സൂപ്പര്‍സോണിക് വിമാനം വീണ്ടും വരുന്നു!

ശബ്ദാതിവേഗത്തില്‍ സഞ്ചരിക്കുന്ന യാത്രാ വിമാനമായ കോണ്‍കോഡിനെക്കുറിച്ച് (Concorde) നിങ്ങള്‍ കേട്ടിരിക്കും! ഫ്രാന്‍സ് ആയിരുന്നു ഈ  സൂപ്പര്‍സോണിക് വിമാനത്തിന്റെ ഉപജ്ഞാതാക്കള്‍. പറക്കാനുള്ള വലിയ ചെലവും വിമാനം സൃഷ്ടിച്ച അമിത ശബ്ദവും കാരണം കോണ്‍കോര്‍ഡ് 2003ല്‍ പ്രവര്‍ത്തനം അവസാനിപ്പിച്ചു.
എന്നാലിപ്പോഴിതാ മറ്റൊരു ശബ്ദാതിവേഗ വിമാനം പണിപ്പുരയിലാണ്. അമേരിക്കന്‍ വ്യോമഗതാഗത കമ്പനിയായ ബൂം സൂപ്പര്‍സോണിക് (Boom Supersonic) ലോകത്തിലെ ഏറ്റവും വേഗമുള്ള സൂപ്പര്‍സോണിക് ജെറ്റ് രൂപകല്‍പന ചെയ്യുന്നു. നാല് എന്‍ജിനുകളാണ് ഇതിനുള്ളത്. ഓവര്‍ചര്‍ (Overture) എന്നു പേരിട്ടിരിക്കുന്ന ഈ വിമാനത്തിന് 65 മുതല്‍ 80 യാത്രക്കാരെ വരെ വഹിച്ചുകൊണ്ട് മണിക്കൂറില്‍ 2100 കിലോമീറ്റര്‍ വേഗം കൈവരിക്കാനുള്ള ശേഷിയുണ്ട്. ഈ വേഗം അനുസരിച്ച് ന്യൂയോര്‍ക്കില്‍ നിന്ന് ലണ്ടനിലേക്ക് എത്താന്‍ മൂന്നര മണിക്കൂര്‍ മതിയാവുമേ്രത! സാധാരണ ഗതിയില്‍ ആറരമണിക്കൂറാണ് ഈ യാത്രയ്ക്ക് എടുക്കുക. കൊച്ചിയില്‍ നിന്നു മുംബൈയിലേക്ക് ഈ വിമാനം പറന്നെത്താന്‍ വെറും 40 മിനിറ്റ് മാത്രം മതി. ഇപ്പോള്‍ രൂപകല്‍പനാ ഘട്ടത്തിലുള്ള ഈ വിമാനം 2024ല്‍ നിര്‍മാണഘട്ടത്തിലേക്കു കടക്കും. 2029ല്‍ യാത്രക്കാരെ വഹിച്ചു പറക്കും. ശബ്ദം പരമാവധി കുറച്ച് പരിസ്ഥിതി സൗഹൃദ ഇന്ധനത്തിലാകും ഓവര്‍ചര്‍ പറക്കുക എന്ന പ്രത്യേകതയുമുണ്ട്.
മണിക്കൂറില്‍ 910 കിലോമീറ്റര്‍ വരെ വേഗത്തില്‍ പോകാന്‍ സാധിക്കുന്ന ബോയിങ് 747-8i ( Boeing 747-8i) വിമാനമാണ് നിലവില്‍ ലോകത്തെ ഏറ്റവും വേഗമുള്ള വിമാനം. ഈ വിമാനത്തിന് പക്ഷേ 660 യാത്രികരെ വരെ വഹിക്കാന്‍ ശേഷിയുണ്ട്.

കമ്പ്യൂട്ടറിന് വേഗമില്ലേ..? പരിഹാരമുണ്ട്...!

 

കമ്പ്യൂട്ടറിന് അല്ലെങ്കില്‍ ലാപ്‌ടോപിന് വേഗം പോരാ എന്ന് പരാതി പറയുന്നവരാണ് നമ്മില്‍ പലരും, അല്ലേ? അല്പം പഴയ സിസ്റ്റങ്ങളാണ് കൈയിലുള്ളതെങ്കില്‍ പറയുകയും വേണ്ട. സോഫ്റ്റ്‌വെയറുകളും മറ്റും നിരന്തരം അപ്‌ഡേറ്റ് ചെയ്യപ്പെട്ടുകൊണ്ടിരിക്കുമ്പോള്‍ ഇത് സ്വാഭാവികമാണ്. ഹാര്‍ഡ്‌വെയറില്‍ മാസങ്ങള്‍കൊണ്ടുതന്നെ വലിയ മാറ്റങ്ങള്‍ വരികയും ചെയ്യുന്നു.

ഈ പ്രശ്നത്തിന് സോഫ്റ്റ്‌വെയര്‍ പരിഹാരവുമായി എത്തിയിരിക്കുകയാണ് മലയാളികളായ വിദ്യാര്‍ഥി സഹോദങ്ങള്‍ വിഷ്ണുവും വാസുദേവും. ഇവരുടെ സംരംഭമായ virga.tech ആണ് ഇപ്പോള്‍ നിങ്ങളെ സഹായിക്കാനെത്തിയിരിക്കുന്നത്. 

ഇതു വഴി പഴയതോ വേഗം കുറഞ്ഞതോ ആയ കംപ്യൂട്ടറുകളുടേയും ലാപ്‌ടോപുകളുടേയും സ്മാര്‍ട് ഫോണുകളുടേയുമെല്ലാം വേഗം പല മടങ്ങ് വര്‍ധിപ്പിക്കാന്‍ സാധിക്കുമത്രേ! കൂടാതെ സ്പേസ് വര്‍ധിപ്പിക്കാനും സാധിക്കും. അതിവേഗ കംപ്യൂട്ടറുകള്‍ ആവശ്യമായ വിഡിയോ എഡിറ്റിംഗ്, അനിമേഷന്‍, ഗെയിമിങ് തുടങ്ങിയവയ്‌ക്കൊക്കെ വിര്‍ഗ ഉപകാരപ്പെടും.
സ്മാര്‍ട് ഫോണോ ടാബ്ലറ്റോ ലാപ്ടോപ്പോ ഉപയോഗിച്ച് വിര്‍ഗയുടെ വെബ് സൈറ്റിലെത്തിയാല്‍ ഈ സേവനങ്ങള്‍ ആവശ്യാനുസരണം തെരഞ്ഞെടുക്കാം. സ്പേസും വേഗവും കൂടാതെ ബാറ്ററി ഉപയോഗവും വിര്‍ഗ വഴി നിയന്ത്രിക്കാം.
ലളിതമായ മൂന്ന് സ്റ്റെപ്പുകളിലൂടെ സാധാരണ കംപ്യൂട്ടര്‍ ഒരു ഗെയിമിങ്ങ് കംപ്യൂട്ടറായി മാറും. വിര്‍ഗയില്‍ സൈന്‍ ഇന്‍/ സൈന്‍ അപ്പ് ചെയ്യുക, ആവശ്യമുള്ള സേവനം തെരഞ്ഞെടുക്കുക, എത്ര സമയം സേവനം ആവശ്യമുണ്ട് എന്ന് അറിയിക്കുക - ഇത്രയും ചെയ്താല്‍ മത്രം മതി.
ഇപ്പോഴിത് പരീക്ഷണ ഘട്ടത്തിലാണ് എന്നാണ് അറിയുന്നത്. ഉടന്‍ പൂര്‍ണരൂപത്തില്‍ ലഭ്യമാകുമത്രേ!

കടലില്‍നിന്ന് വൈദ്യുതി

കടല്‍ ഊര്‍ജത്തിന്റെ കലവറയാണെന്ന് നമുക്കറിയാം. ഈ ഊര്‍ജസാധ്യതയെ ഉപയോഗിക്കാനൊരുങ്ങുകയാണ് ജപ്പാന്‍. എത്ര വലിയ സമുദ്രജലപ്രവാഹങ്ങളിലും തകരാതെ നിന്നുകൊണ്ട് വൈദ്യുതി ഉല്പാദിപ്പിക്കാന്‍ ശേഷിയുള്ള ഭീമാകാരമായ ടര്‍ബൈനുകള്‍ സമുദ്രത്തില്‍ സ്ഥാപിക്കുന്ന പദ്ധതിയിലാണ് ജപ്പാന്‍. ഇഷികാവജിമ ഹരിമ ഹെവി ഇന്‍ഡസ്ട്രീസ് ( Ishikawajima-Harima Heavy Industries - IHI) കോര്‍പറേഷനാണ് ഈ പദ്ധതിക്ക് പിന്നില്‍. 330 ടണ്‍ ഭാരമുള്ള ടര്‍ബൈനാണ് ആദ്യഘട്ടത്തില്‍ സമുദ്രത്തില്‍ സ്ഥാപിക്കുക. കയ്‌റു (Kairyu) എന്നാണ് ഈ ഭീമന്‍ ടര്‍ബൈനുകള്‍ക്ക് പേരിട്ടിരിക്കുന്നത്. 22 മീറ്റര്‍ നീളമുള്ള മൂന്ന് ടര്‍ബൈനുകളാണ് ഇതിലുണ്ടാവുക. ഇതിനുള്ളിലെ ടര്‍ബൈന്‍ ബ്ലേഡിന് 11 മീറ്റര്‍ നീളമുണ്ടാവും. ഇത് സമുദ്രത്തിന്റെ അടിഭാഗത്ത് നങ്കൂരമിട്ട നിലയിലാണ് സ്ഥാപിക്കുക. ഈ ടര്‍ബൈനുകള്‍ സമുദ്രജല പ്രവാഹങ്ങളില്‍ നിന്നുള്ള ഊര്‍ജം വൈദ്യുതിയായി പുറത്തെത്തിക്കുകയാണ് ചെയ്യുക.

താമസിയാതെ ഇതിന് സമാനമായ നിരവധി ടര്‍ബൈനുകള്‍ സ്ഥാപിക്കാന്‍ ജപ്പാന് പദ്ധതിയുണ്ട്. ഉയര്‍ന്ന എന്‍ജിനീയറിങ് ചെലവും പാരിസ്ഥിതികമായ വെല്ലുവിളികളും ഇത്തരത്തില്‍ സമുദ്രത്തില്‍ നിന്നുള്ള വൈദ്യുതോല്‍പാദനത്തിന് പ്രതിബന്ധമാവാറുണ്ട്. ഈ വെല്ലുവിളികള്‍ മറികടക്കാനായാല്‍ ജപ്പാന് ആവശ്യമായ ഊര്‍ജത്തിന്റെ 40 മുതല്‍ 70 ശതമാനം വരെ വൈദ്യുതി സംഭാവന ചെയ്യാന്‍ ഇത്തരം ടര്‍ബൈനുകള്‍ക്ക് സാധിക്കുമെന്നാണ് കണക്കുകൂട്ടല്‍. 

 

 

Students India ലഭിക്കാൻ ഇവിടെ ക്ലിക്ക് ചെയ്യൂ ...

 

ഏഷ്യയിലെ ഏറ്റവും വലിയ ലിക്വിഡ് മിറര്‍ ടെലസ്‌കോപ് ഇന്ത്യയില്‍

ഇന്ത്യയിലെ ആദ്യത്തെ ലിക്വിഡ് മിറര്‍ ടെലസ്‌കോപ് (Liquid Mirror Telescope) ഉത്തരാഖണ്ഡിലെ ദേവസ്തലിലുള്ള (Devasthal) ഒബ്‌സര്‍വേറ്ററിയില്‍ സ്ഥാപിതമായി. ഇത് ഏഷ്യയിലെ തന്നെ ഇത്തരത്തിലുള്ള ഏറ്റവും വലിയ ടെലസ്‌കോപാണ്. ഇന്ത്യാ ഗവണണ്‍മെന്റിന് കീഴിലുള്ള ഡിപാര്‍ട്‌മെന്റ് ഓഫ് സയന്‍സ് ആന്‍ഡ് ടെക്‌നോളജിയുടെ ഉടമസ്ഥതയിലുള്ള ആര്യഭട്ട റിസര്‍ച്ച് ഇന്‍സ്റ്റിറ്റ്യൂട്ട് ഓഫ് ഒബ്‌സര്‍വേഷണല്‍ സയന്‍സസ് (Aryabhatta Research Institute of Observational Sciences (ARIES)) എന്ന സ്ഥാപനത്തിലാണ് ഒബസര്‍വേറ്ററി സ്ഥിതചെയ്യുന്നത്. പ്രപഞ്ച പ്രതിഭാസങ്ങളായ സൂപ്പര്‍നോവകള്‍, ബഹിരാകാശത്തെ അവശിഷ്ടങ്ങള്‍, ഉല്‍ക്കകള്‍ തുടങ്ങിയവയെല്ലാം നിരീക്ഷിക്കാനും പഠനവിധേയമാക്കാനും ഈ ടെലസ്‌കോപ് സഹായിക്കും.

ബെല്‍ജിയം, കാനഡ എന്നീ രാജ്യങ്ങളിലെ ശാസ്ത്രജ്ഞരുടെ സഹകരണത്തോടെയാണ് ഇന്ത്യന്‍ ജ്യോതിശാസ്ത്രജ്ഞര്‍ ഈ ടെലസ്‌കോപ് നിര്‍മിച്ചത്. സമുദ്ര നിരപ്പില്‍ നിന്നും 2450 മീറ്റര്‍ ഉയരത്തിലാണിത് സ്ഥാപിച്ചിരിക്കുന്നത്. ഏതാണ്ട് നാല് മീറ്റര്‍ വ്യാസമുള്ള കറങ്ങുന്ന മിററാണ് ഈ ടെലസ്‌കോപിനുള്ളത്. ഈ ടെലസ്‌കോപില്‍ ദ്രവരൂപത്തിലുള്ള മെര്‍ക്കുറിയുടെ സഹായത്തിലാണ് വെളിച്ചം ശേഖരിക്കുകയും ഫോക്കസ് സാധ്യമാക്കുകയും ചെയ്യുന്നത്. ഒരു ഇലക്ട്രോണിക് ക്യാമറ ഉപയോഗിച്ച് തല്‍സമയം ഈ ദൃശ്യങ്ങള്‍ പകര്‍ത്തി ശേഖരിക്കുകയും ചെയ്യുന്നു.
പോളണ്ടിലെ പൊസ്നാന്‍ നിരീക്ഷണ കേന്ദ്രവും ഉസ്ബക്കിസ്ഥാനിലെ അക്കാദമി ഓഫ് സയന്‍സസ് ആന്‍ഡ് നാഷണല്‍ യൂണിവേഴ്സിറ്റി ഓഫ് ഉസ്ബക്കിസ്ഥാനും ഈ പദ്ധതിയുമായി സഹകരിക്കുന്നുണ്ട്. കൂടാതെ  ബ്രിട്ടിഷ് കൊളംബിയ സര്‍വകലാശാല, ലാവല്‍ സര്‍വകലാശാല, മോണ്ട്രിയാല്‍ സര്‍വകലാശാല, ടൊറന്റോ സര്‍വകലാശാല, യോര്‍ക്ക് സര്‍വകലാശാല, വിക്ടോറിയ സര്‍വകലാശാല എന്നിവയും പദ്ധതിയുമായി സഹകരിക്കുന്നുണ്ട്.

100 വര്‍ഷത്തേക്ക് ചാര്‍ജ് ചെയ്യാവുന്ന ബാറ്ററി...!

100 വര്‍ഷത്തേക്ക് ചാര്‍ജ് ചെയ്യാവുന്ന ബാറ്ററി സാങ്കേതികവിദ്യ വികസിപ്പിച്ചെടുത്തതായി വാര്‍ത്ത! ഇലോണ്‍ മസ്‌കിന്റെ ഉടമസ്ഥതയിലുള്ള കാനഡയിലെ ടെസ്ല ബാറ്ററി റിസര്‍ച്ച് ഗ്രൂപ്പാണ് ഡല്‍ഹൗസി യൂണിവേഴ്‌സിറ്റിയുമായി (Dalhousie University) സഹകരിച്ച് ഈ നേട്ടം കൈവരിച്ചിരിക്കുന്നത്. നിക്കല്‍ അധിഷ്ഠിത ബാറ്ററി സാങ്കേതികവിദ്യയാണ് അവതരിപ്പിച്ചിരിക്കുന്നത്. ഡല്‍ഹൗസി യൂണിവേഴ്സിറ്റിയുടെ ഭാഗമായി പ്രവര്‍ത്തിക്കുന്ന, ബാറ്ററി സാങ്കേതികവിദ്യയില്‍ ലോകത്തെ പ്രമുഖ വിദഗ്ധരില്‍ ഒരാളായ ജെഫ് ഡാനുമായി (Jeff Dahn) സഹകരിച്ചാണ് ഈ ഗവേഷണം നടന്നിരിക്കുന്നത്. നിലവില്‍ ഉപയോഗിക്കുന്ന ലിഥിയം ഫെറം ഫോസ്‌ഫേറ്റ് സെല്ലുകള്‍ക്ക് സമാനമായ ചാര്‍ജിങ്ങും ഊര്‍ജ സാന്ദ്രതയും നല്‍കുന്നതുമാണ് പുതിയ ബാറ്ററി ടെക്‌നോളജി എന്നും ടെസ് ല അവകാശപ്പെടുന്നു.

ഇലക്ട്രിക് വാഹനങ്ങള്‍ക്ക് ഏറെ ഉപകാരപ്പെടുന്നതാകും ഈ ബാറ്ററി ടെക്‌നോളജി എന്നാണ് വിലയിരുത്തപ്പെടുന്നത്. ലിഥിയം-അയണ്‍ ബാറ്ററികളെ അപേക്ഷിച്ച് ഈ ബാറ്ററികള്‍ ചാര്‍ജ് ചെയ്താല്‍ കൂടുതല്‍ കാലം നീണ്ടുനില്‍ക്കുമെന്നും ഗവേഷകര്‍ അവകാശപ്പെടുന്നു. ബാറ്ററി ചാര്‍ജ് ചെയ്യുമ്പോഴുളള താപനില കുറയ്ക്കാനും സാധിക്കുന്നതാണ്. മുന്‍പ് കോബാള്‍ട്ട് ആയിരുന്നു നിക്കല്‍ ബാറ്ററികളിലെ ഒരു പ്രധാന ഘടകം. എന്നാല്‍, കോബാള്‍ട്ടിന്റെ ലഭ്യതയെ സംബന്ധിച്ച ആശങ്കകള്‍ ഇല്ലാതാക്കാന്‍ പുതിയ ബാറ്ററി സഹായിക്കുമെന്നാണ് ഗവേഷകര്‍ കരുതുന്നത്.

2022 അന്താരാഷ്ട്ര ഗ്ലാസ് വര്‍ഷം

ഐക്യരാഷ്ട്ര സംഘടന ഈ വര്‍ഷം അന്താരാഷ്ട്ര ഗ്ലാസ് വര്‍ഷമായി (International Year of Glass) പ്രഖ്യാപിച്ചു. ഗ്ലാസിന് മനുഷ്യന്റെ നിത്യജീവിതത്തില്‍ എത്രമാത്രം പ്രാധാന്യമുണ്ട് എന്നതിന്റെ വിളംബരമാണ് ഈ വര്‍ഷാചരണം. ശാസ്ത്ര, സാമ്പത്തിക, സാംസ്‌കാരിക രംഗങ്ങളിലെ ഗ്ലാസിന്റെ വിലമതിക്കാനാവാത്ത പങ്കിനെ ആഘോഷിക്കുകയാണിതിലൂടെ. അച്ചാറു കുപ്പിയിലും ചായക്കപ്പിലും കണ്ണടയിലും ജനല്‍പാളികളിലും മൊബൈല്‍ സ്‌ക്രീനിലും മൈക്രോസ്‌കോപുകളിലും ഒപ്ടിക്കല്‍ ഫൈബറുകളിലും എന്നുവേണ്ട പേപ്പര്‍ വെയ്റ്റില്‍വരെ ഗ്ലാസ് മയമാണ്. ഒട്ടുമിക്ക ജീവിതരംഗങ്ങളിലും ഗ്ലാസ് അത്രമേല്‍ പ്രാധാന്യമുള്ളതായിത്തീര്‍ന്നിരിക്കുന്നു. 

പ്രകാശം കടത്തിവിടാനുള്ള കഴിവാണ് ഗ്ലാസിന്റെ പ്രധാന സവിശേഷത. പലവിധ വസ്തുക്കള്‍ കൂട്ടിച്ചേര്‍ത്ത് കാഠിന്യവും നിറവും സ്വഭാവവുമൊക്കെ മാറ്റിയെടുക്കാനും കഴിയുമെന്നത് മറ്റൊരു പ്രത്യേകത. എളുപ്പത്തില്‍ രൂപമാറ്റം വരുത്താമെന്നതും പരിസ്ഥിതിക്ക് വലിയ ദോഷമുണ്ടാക്കുന്നില്ല എന്നതും ഗ്ലാസിന്റെ പ്രധാന്യം വര്‍ധിപ്പിക്കുന്നു.

 

കേള്‍ക്കാന്‍ കഴിയുന്ന വസ്ത്രങ്ങള്‍ വരുന്നു...!

ശബ്ദങ്ങള്‍ കേള്‍ക്കാന്‍ കഴിയുന്ന വസ്ത്രങ്ങള്‍... ശബ്ദ സന്ദേശങ്ങള്‍ പുറപ്പെടുവിക്കാന്‍ കഴിയുന്ന വസ്ത്രങ്ങള്‍... ഇതൊന്നും ഫിക്ഷന്‍ സിനിമകളിലെ കാര്യങ്ങളല്ല, പ്രവര്‍ത്തിപഥത്തിലെത്താന്‍ തയാറാറെടുക്കുന്ന യാഥാര്‍ത്ഥ്യങ്ങളാണ്.

സിംഗപൂരിലെ പ്രശസ്തമായ നാന്‍യാങ് യൂണിവേഴ്‌സിറ്റിയിലെ ഗവേഷകനായ വെയ് യാന്‍ (Wei Yan) ആണ് വസ്ത്രങ്ങളിലെ പുതുപരീക്ഷണങ്ങള്‍ക്കു പിന്നില്‍. മുന്‍പ് കേംബ്രിഡ്ജിലെ മസാച്ചുസെറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജിയില്‍ സേവനം ചെയ്യുന്ന കാലത്ത് തുടങ്ങിയ ഗവേഷണങ്ങളാണ് ഇപ്പോള്‍ ഫലപ്രാപ്തിയില്‍ എത്തിയിരിക്കുന്നത്.

ഈ പരീക്ഷങ്ങള്‍ക്ക് യാന്‍ മാതൃകയാക്കിയത് മനുഷ്യന്റെ ചെവികളെയാണ്. ചെവിയിലെ ഡ്രം എന്ന ഭാഗത്തെ ശബ്ദതരംഗങ്ങള്‍ വൈബ്രേറ്റ് ചെയ്യിക്കുന്നു. തുടര്‍ന്ന് കോക്ലിയ എന്ന ഭാഗമാണ് കമ്പനങ്ങളെ ഇലക്ട്രിക്കല്‍ സിഗ്നലുകളാക്കി മാറ്റുന്നത്. ഇയര്‍ ഡ്രം യഥാര്‍ത്ഥത്തില്‍ ഫൈബറുകള്‍കൊണ്ട് നിര്‍മിച്ചിട്ടുള്ളതാണ്. ഇതുപോലെ തന്നെ ശബ്ദം സൃഷ്ടിക്കുന്ന കമ്പനം പിടിച്ചെടുക്കാന്‍ കഴിയുന്ന പ്രത്യേകതരം ഫൈബറുകളെ വികസിപ്പിച്ചെടുക്കാന്‍ കഴിയുമെന്നാണ് ഇപ്പോള്‍ തെളിയിക്കപ്പെട്ടിരിക്കുന്നത്. കോട്ടണും ത്വരോണ്‍ (Twaron) എന്നറിയപ്പെടുന്ന മറ്റൊരു പദാര്‍ത്ഥവും കൂട്ടിയിണക്കി തയാറാക്കുന്ന നൂലിഴകള്‍കൊണ്ട് നിര്‍മിക്കുന്ന വസ്ത്രങ്ങള്‍ക്ക് ശബ്ദത്തിലെ ഊര്‍ജത്തെ കമ്പനങ്ങളാക്കാന്‍ കഴിയുമത്രേ! ഇതില്‍ പ്രത്യേക പീസോഇലക്ട്രിക് ( piezoelectric ) മെറ്റീരിയലുകളും കൂട്ടിച്ചേര്‍ക്കുമ്പോള്‍ അത് കമ്പനങ്ങളില്‍നിന്ന് ചെറിയ ഇലക്ട്രിക് സിഗ്നലുകള്‍ സൃഷ്ടിക്കുന്നു. ഇത് പ്രത്യേക ഉപകരണങ്ങള്‍ വഴി പിടിച്ചെടുക്കാന്‍ കഴിയുമത്രെ!
ഇത്തരം 'ഹൈടെക് ത്രെഡുകള്‍' റെഡിയാവുന്നതോടെ വസ്ത്രം ഒരു ഹൈടെക് കമ്മ്യൂണിക്കേഷന്‍ ഉപകരണമായി മാറുമെന്നാണ് ശാസ്ത്രലോകം പ്രതീക്ഷിക്കുന്നത്.

ഇനി ഗ്രീന്‍ ഹൈഡ്രജന്റെ കാലം

പരമ്പരാഗത ഊര്‍ജ സ്രോതസ്സുകള്‍ വറ്റിക്കൊണ്ടിരിക്കുന്നു എന്ന വസ്തുത നാം മുന്‍പും ചര്‍ച്ച ചെയ്തതാണ്. മറ്റ് സ്രോതസ്സുകളേപ്പറ്റി ലോകമെമ്പാടും ഗവേഷകര്‍  കാര്യമായി ചിന്തിച്ചുകൊണ്ടിരിക്കുകയാണ്. പ്രകൃതി സൗഹൃദ ഊര്‍ജ സ്രോതസ്സായി ഗണിക്കപ്പെടുന്ന ഹൈഡ്രജന്‍ ആണ് ഇത്തരം ഗവേഷണങ്ങളുടെ ഒരു ശ്രദ്ധേകേന്ദ്രം.

ഇന്ത്യയിലെ ഇത്തരത്തിലുള്ള ആദ്യ ഹൈഡ്രജന്‍ പ്ലാന്റ് ഉദ്ഘാടനം ചെയ്യപ്പെട്ടിരിക്കുന്നു. പൊതുമേഖലാ സ്ഥാപനമായ ഓയില്‍ ഇന്ത്യാ ലിമിറ്റഡ് (Oil India Limited) ആണ് ഈ പദ്ധതിയുടെ പിന്നില്‍. അസമിലെ ജോര്‍ഹത് (Jorhat) എന്ന സ്ഥലത്താണ് പുതിയ പരീക്ഷണ പദ്ധതി സ്ഥാപിക്കപ്പെട്ടിരിക്കുന്നത്. ഇപ്പോള്‍ ഓയില്‍ ഇന്ത്യയുടെ ഉടമസ്ഥതയിലുള്ള സൗരോര്‍ജ പ്ലാന്റിലെ ഒരു ഭാഗം ഉപയോഗപ്പെടുത്തിയാണ് ഹൈഡ്രജന്‍ ഉല്പാദനം നടത്തുന്നത്. ദിവസം 10 കിലോഗ്രാം മാത്രമാണ് തുടക്കത്തിലുള്ള ഉല്പാദനം. ഇത് പടിപടിയായി ഉയര്‍ത്തും. ഇവിടെ ഉല്പാദിപ്പിക്കുന്ന ഗ്രീന്‍ ഹൈഡ്രജന്‍ പ്രകൃതിവാതകവുമായി കൂട്ടിക്കലര്‍ത്തി കമേഴ്‌സ്യല്‍ വാഹനങ്ങളിലടക്കം ഇന്ധനമായി ഉപയോഗപ്പെടുത്താം എന്നാണ് ഓയില്‍ ഇന്ത്യ കരുതുന്നത്. ഇതിനായി ഗുവാഹതി ഐഐറ്റിയുമായി ചേര്‍ന്ന് ഗവേഷണങ്ങള്‍ പുരോഗമിക്കുകയാണ്.
ഈ ബ്ലെന്‍ഡഡ് ഇന്ധനം വാഹനങ്ങളില്‍ ഉപയോഗിക്കുന്ന അവസരത്തില്‍ ഹെഡ്രജന്‍ കത്തുമ്പോള്‍ കാര്‍ബണ്‍ ഡെഓക്‌സൈഡ് പുറപ്പെടുവിക്കുന്നില്ല എന്നതാണ് ഇതിന്റെ പാരിസ്ഥിതിക നേട്ടം. ഗതാഗതത്തില്‍ മാത്രമല്ല വ്യവസായങ്ങളിലും ഊര്‍ജോല്പാദന കേന്ദ്രങ്ങളിലും ഒക്കെ ഇത് വ്യാപകമാക്കുന്ന കാര്യം പരിഗണനയിലാണ്.

കാര്‍ബണ്‍ പുറന്തള്ളാതെ ഊര്‍ജമുണ്ടാക്കാം

ഊര്‍ജ ഉപയോഗത്തെക്കുറിച്ച് ലോകം മുഴുവന്‍ ആശങ്കപ്പെടുന്ന കാലമാണിത്. പരമ്പരാഗത ഊര്‍ജ സ്രോതസ്സുകള്‍ കൈവിട്ട് മറ്റ് വഴികള്‍ കണ്ടെത്താനുള്ള തീവ്ര ശ്രമം നടന്നുവരുന്നു. ഇതിനിടയില്‍ മറ്റൊരു വാര്‍ത്ത, ലാറ്റിനമേരിക്കന്‍ രാജ്യമായ ചിലിയില്‍നിന്ന്.

ഹൈലി ഇനോവേറ്റീവ് ഫ്യുവല്‍സ് (HIF) എന്ന സ്ഥാപനം ചിലിയിലെ പുന്റ അരിനസില്‍ നിര്‍മിക്കുന്ന പുതിയ വന്‍ പ്ലാന്റ് ആണ് ലോക ശ്രദ്ധ ആകര്‍ഷിക്കുന്നത്. കാറ്റ്, ജലം, വാതകം എന്നിവയെ സിന്തറ്റിക് ഇന്ധനങ്ങള്‍ അഥവാ ഇഫ്യൂവല്‍ ആക്കി മാറ്റുകയാണ് ഇവിടെ ചെയ്യുക. ഇവ കാറുകള്‍ മുതല്‍ വിമാനങ്ങളില്‍ വരെ ഉപയോഗിക്കാന്‍ സാധിക്കുന്നതരത്തിലാണ് ഉല്പാദനം. പൂര്‍ണമായി കാര്‍ബണ്‍ ബഹിര്‍ഗമനം ഇല്ലാതെയാണ് പ്രവര്‍ത്തനങ്ങള്‍ എന്നതാണ് ഏറ്റവും വലിയ പ്രത്യേകത. ഈ പദ്ധതിക്ക് 'ഹാരു ഒനി' (Haru Oni) എന്നാണ് പേരിട്ടിരിക്കുന്നത്.
കാറ്റാടിയന്ത്രങ്ങളും സോളാര്‍ പാനലുകളും ഉപയോഗിച്ച് നിര്‍മിക്കുന്ന വൈദ്യുതോര്‍ജ്ജം ഉപയോഗിച്ച് ഇലക്ട്രോലിസിസ് എന്ന പ്രക്രിയയിലൂടെ ജലത്തില്‍ നിന്ന് ഹൈഡ്രജനും ഓക്സിജനും വേര്‍തിരിച്ചെടുക്കും. ഈ ഹൈഡ്രജന്‍ വാതകത്തെ അന്തരീക്ഷത്തില്‍ നിന്ന് ശേഖരിക്കുന്ന കാര്‍ബണ്‍ ഡയോക്സൈഡുമായി സംയോജിപ്പിച്ചാണ് ഇഫ്യുവല്‍ ഉണ്ടാക്കുന്നത്. മെഥനോള്‍, പ്രപെയ്ന്‍, ഗാസൊലിന്‍, ജെറ്റ്ഫ്യുവല്‍ എന്നിവയുള്‍പ്പടെ ദൈനം ദിന ആവശ്യങ്ങള്‍ക്കുള്ള എല്ലാ ഇന്ധനങ്ങളും ഈ പ്രക്രിയയിലൂടെ നിര്‍മിക്കാന്‍ സാധിക്കുമെന്നാണ് പ്രതീക്ഷ. ഇത് ക്രൂഡ് ഓയില്‍ ഉല്പന്നങ്ങള്‍ക്ക് ബദലാണ്. എന്നാല്‍ വൈദ്യുതോര്‍ജത്തിന് പകരമാവില്ല താനും.
ഇഫ്യൂവല്‍ നിര്‍മിച്ചെടുക്കുന്നതിന് വലിയ അളവില്‍ ഊര്‍ജം ആവശ്യമാണ് എന്നതാണ് നിലവില്‍ ഇതിനുണ്ടായിരുന്ന ന്യൂനത. അതുകൊണ്ടുതന്നെ ഇങ്ങനെ ഉല്പാദിപ്പിക്കുന്ന ഇന്ധനങ്ങള്‍ക്ക് പെട്രോള്‍, ഡീസല്‍ ഇന്ധനങ്ങളേക്കാള്‍ ചിലവ് കൂടും. എന്നാല്‍ പുതിയ സാങ്കേതികവിദ്യയിലൂടെ ചിലവ് ഗണ്യമായി കുറയുമെന്ന് മാത്രമല്ല, കാര്‍ബണ്‍ ഒട്ടും ഉല്‍പാദിപ്പിക്കുന്നില്ല എന്നതാണ് ശ്രദ്ധേയം. ഫലത്തില്‍ അന്തരീക്ഷത്തിലെ കാര്‍ബണ്‍ ഡയോക്സൈഡിന്റെ പുനരുപയോഗമാണ് ഇവിടെ നടക്കുന്നത്.

കമ്പ്യൂട്ടര്‍ ഒരു കണ്ണാടിയാകുമ്പോള്‍... ഒരു മലയാളി വിപ്ലവം

കമ്പ്യൂട്ടറുകളെപ്പറ്റി ആലോചിക്കുമ്പോള്‍ നമ്മുടെ മനസ്സിലെത്തുന്നത് ഡെസ്‌ക്ടോപും ലാപ്‌ടോപും ടാബ്‌ലറ്റ് കമ്പ്യൂട്ടറുമൊക്കെയാണ്, അല്ലേ? ഇപ്പോഴാകട്ടെ കമ്പ്യൂട്ടറുപയോഗിച്ച് ചെയ്യാവുന്ന കുറേക്കാര്യങ്ങള്‍ ചെയ്യാന്‍ കഴിവുള്ള മൊബൈല്‍ ഫോണുകളും ലഭ്യമാണ്. എന്നാല്‍ ഇതൊന്നും ഇല്ലാതെ തന്നെ ലോകത്ത് എവിടെയിരുന്നും കംപ്യൂട്ടര്‍ ഉപയോഗിക്കാന്‍ കഴിയും! ഒരു കണ്ണട കയ്യിലുണ്ടായാല്‍ മതി..!

ഈ കണ്ണട പോലുള്ള ഉപകരണം ഒരു സ്മാര്‍ട് ഗ്ലാസ് ആണ്. ഇത് വികസിപ്പിച്ചതോ, ഒരു മലയാളി സംരംഭകനും! അമേരിക്കയിലെ കാലിഫോര്‍ണിയയിലുള്ള മില്‍പിറ്റാസ് (Milpitas) ആസ്ഥാനമായി പ്രവര്‍ത്തിക്കുന്ന സ്റ്റാര്‍ട്ടപ്പ് നിമോ പ്ലാനറ്റ് ( Nimo Planet ) എന്ന സ്ഥാപനമാണ് ഈ സ്മാര്‍ട് ഗ്ലാസിന്റെ പിന്നിലുള്ളത്.  മലപ്പുറം തിരൂര്‍ സ്വദേശി രോഹില്‍ദേവ് (Rohildev Nattukallingal) ആണ നിമോപ്ലാനറ്റിന്റെ സ്ഥാപകനും സിഇഒയും. 

Rohildev Nattukallingal

ലോകത്തെ ആദ്യത്തെ 'അള്‍ട്രാ പോര്‍ട്ടബ്ള്‍ മള്‍ട്ടി സ്‌ക്രീന്‍ കംപ്യൂട്ടര്‍' എന്ന വിശേഷണവുമായി എത്തുന്ന നിമോ സ്മാര്‍ട് ഗ്ലാസ് ഉടന്‍ വിപണിയില്‍ ലഭ്യമാകും. ഏകദേശ വില 60,000 രൂപ. ആദ്യ ഘട്ടത്തില്‍ അമേരിക്കയിലും ഇന്ത്യയിലും ലഭിക്കും. കേരളത്തില്‍ കൊച്ചിയില്‍ നിമോയുടെ ഒരു ടീം പ്രവര്‍ത്തിക്കുന്നുണ്ട്.  

പ്രഫഷനല്‍ ഉപയോഗത്തിനുള്ള സ്മാര്‍ട്ട് ഗ്ലാസുകള്‍ വളരെ അപൂര്‍വമാണിപ്പോള്‍. ഉള്ളതിന് വലിയ വിലയുമാണ്.

നിമോ സ്മാര്‍ട് ഗ്ലാസ് ധരിച്ചാല്‍ 2 മീറ്റര്‍ അകലെ ഒരു വെര്‍ച്വല്‍ സ്‌ക്രീന്‍ തുറന്നു വരും. ബ്ലൂടൂത്ത്, വൈഫൈ, മൊബൈല്‍ ഹോട്‌സ്‌പോട് എന്നിവയുമായെല്ലാം കണക്ട് ചെയ്യാം. 90 ഗ്രാം മാത്രമാണ് ഭാരം. 6 സ്‌ക്രീനുകള്‍ വരെ കാണാം. മൗസും ബ്ലൂ ടൂത്ത് കീ പാഡും ഉപയോഗിക്കാം.  

എന്തായാലും വെയറബിള്‍ കമ്പ്യൂട്ടിംഗ് രംഗത്ത് മലയാളിത്തിളക്കത്തിനായി കാത്തിരിക്കാം.

ചൂടനെ ഫോട്ടോയിലാക്കി സോളോ

സൂര്യനെ അടുത്തു കാണാന്‍ മനുഷ്യന്‍ പരിശ്രമം തുടങ്ങിയിട്ട് കാലം കുറേയായി. എന്നാല്‍ ശതകോടി സെല്‍ഷ്യസില്‍ വെന്തുരുകി നില്‍ക്കുന്ന ആ ചൂടന്‍ നക്ഷത്രത്തിന്റെ ഏഴയലത്ത് അടുക്കാന്‍ ആര്‍ക്കുമായില്ല. ഇപ്പോഴിതാ സൂര്യന് പരമാവധി അടുത്തെത്തി കിടിലന്‍ ചിത്രങ്ങള്‍ പകര്‍ത്തിയിരിക്കുന്നു!

ആരാണ് ഈ സാഹസം കാണിച്ചതെന്നല്ലേ? യൂറോപ്യന്‍ ബഹിരാകാശ ഏജന്‍സി (European Space Agency) വികസിപ്പിച്ച ബഹിരാകാശ പേടകമായ സോളാര്‍ ഓര്‍ബിറ്റര്‍ ( Solar Orbiter)  ആണ് ഈ ചിത്രങ്ങള്‍ പകര്‍ത്ത് ലോകത്തെ വിസ്മയിപ്പിച്ചിരിക്കുന്നത്. ഈ ഓര്‍ബിറ്ററിന് സോളോ (SolO) എന്നാണ് ചെല്ലപ്പേര്. സൂര്യനെ നിരീക്ഷിക്കുന്നതിനും പഠനങ്ങള്‍ നടത്തുന്നതിനും വേണ്ടി 2020 ഫെബ്രുവരി 10നാണ് സോളോ വിക്ഷേപിക്കപ്പെട്ടത്.

2022 മാര്‍ച്ച് 7ന് സോളോ എടുത്ത സൂര്യന്റെ 25 ചിത്രങ്ങള്‍ സംയോജിപ്പിച്ചാണ് ഇപ്പോള്‍ പുറത്തുവിട്ടിരിക്കുന്നത്. മനുഷ്യന് ഇതുവരെ ലഭിച്ചിട്ടുള്ളതില്‍ ഏറ്റവും മിഴിവേറിയ സൂര്യചിത്രങ്ങളാണിവ. സോളോയില്‍ ഘടിപ്പിച്ചിരിക്കുന്ന എക്‌സ്ട്രീം അള്‍ട്രാവയലറ്റ് ഇമേജര്‍ (Extreme Ultraviolet Imager (EUI)) എന്ന സംവിധാനം ഉപയോഗിച്ചാണ് ചിത്രങ്ങള്‍ പകര്‍ത്തിയത്. സൂര്യന്റെ പൂര്‍ണരൂപവും വാതകനിബദ്ധമായ ബാഹ്യാന്തരീക്ഷമായ കൊറോണയും (Corona) ഒക്കെ ഈ ചിത്രത്തില്‍ പതിഞ്ഞിരിക്കുന്നു.

സോളോ സൂര്യന് അടുത്തെത്തി ചിത്രമെടുത്തു എന്നൊക്കെ പറയുമ്പോള്‍ അത് ഏകദേശം 75 ദശലക്ഷം കിലോമീറ്റര്‍ അകലെ നിന്നാണ് എന്നു കൂടി ഓര്‍ക്കണം കേട്ടോ!

ഭൂമിക്കടിയില്‍നിന്ന് പുതിയ ഊര്‍ജം!

പെട്രോളിനും ഡീസലിനും അനുദിനം വില കൂടുന്നതൊക്കെ ജനജീവിതത്തെ ബാധിക്കുന്നുണ്ട്. പരമ്പരാഗതമായ ഇത്തരം ഊര്‍ജ്ജ സ്രോസതസ്സുകള്‍ വറ്റിക്കൊണ്ടിരിക്കുകയാണ് എന്നതാണ് യാഥാര്‍ത്ഥ്യം. പുതിയ പുതിയ സ്രോതസ്സുകള്‍ നാം തേടിക്കൊണ്ടുമിരിക്കുകയാണ്. ഇപ്പോഴിതാ അത്തരമൊരു വ്യത്യസ്തമായ വാര്‍ത്ത വരുന്നു. ഭൂമിയുടെ ചൂടേറിയ അകക്കാമ്പില്‍നിന്നും അളവറ്റ ഊര്‍ജ്ജം ഉല്പാദിപ്പിക്കാന്‍ പരിശ്രമിക്കുകയാണ് ക്വായിസ് (Quaise) എന്ന കമ്പനി. 2020ലാണ ഈ കമ്പനി സ്ഥാപിക്കപ്പെട്ടത്.

സൗരോര്‍ജവും കാറ്റും പോലെ പുനരുപയോഗിക്കാന്‍ സാധിക്കുന്ന ഹരിത ഊര്‍ജ വിഭവങ്ങളിലൊന്നാണ് ജിയോതെര്‍മല്‍ ഊര്‍ജ്ജം. എന്നാല്‍ ഈ രംഗത്ത് അധികം ശ്രദ്ധ ഉണ്ടായിട്ടില്ല. അതിനാവശ്യമായ സാങ്കേതിക വിദ്യകളുടെ അഭാവം തന്നെയാണിതിന് കാരണം. ഇതുവരെ ഭൂമിയില്‍ ഏറ്റവും ആഴത്തില്‍ കുഴിച്ചിട്ടുള്ളത് 12.3 കിലോമീറ്ററാണ്. വളരെ ഉയര്‍ന്ന താപനില ഉള്ള ഭൗമാന്തര്‍ഭാഗങ്ങളില്‍ തുരക്കാന്‍ ശേഷിയുള്ള യന്ത്രങ്ങള്‍ കണ്ടെത്തുന്നത് തന്നെ ഒരു വെല്ലുവിളിയാണ്. ഇലക്ട്രോ മാഗ്‌നെറ്റിക് റേഡിയേഷന്‍ തരംഗങ്ങള്‍ ഉപയോഗിച്ച് ഉരുക്കിയെടുക്കുകയെന്ന പുതിയതായി പരീക്ഷിക്കപ്പെടുന്നത്. ഗെയ്റോട്രോണ്‍സ് എന്നു വിളിക്കുന്ന ഉപകരണങ്ങള്‍ ഉപയോഗിച്ച് തുടര്‍ച്ചയായുള്ള ഇലക്ട്രോമാഗ്‌നെറ്റിക് റേഡിയേഷന്‍ തരംഗങ്ങള്‍ സൃഷ്ടിച്ചുകൊണ്ടാണ് ഇതു സാധ്യമാക്കുന്നത്. ഇങ്ങനെ 20 കിലോമീറ്റര്‍ വരെ ആഴത്തില്‍ കുഴിക്കാമെന്നാണ് ഈ ഗവേഷകരുടെ പ്രതീക്ഷ. ഇപ്രകാരം ഇത്രയും ആഴത്തില്‍ കുഴിയെടുക്കാനായാല്‍ വന്‍തോതില്‍ വൈദ്യുതി ഉത്പാദിപ്പിക്കാന്‍ പറ്റിയ സാഹചര്യം ഭൂമിക്കടിയില്‍ ഒരുക്കാന്‍ കഴിയുമത്രേ. 2026ല്‍ ഇതു സാധ്യമാകുമെന്നാണ് ക്വായിസ് പറയുന്നത്.
കാര്‍ലോസ് അറാക്ക് (Carlos Araque) ആണ് അമേരിക്ക ആസ്ഥാനമായ ക്വായിസ് എന്ന കമ്പനിയുടെ തലവന്‍.

ചൊവ്വയില്‍ പൂ വിരിഞ്ഞോ...?!

അമേരിക്കന്‍ ബഹിരാകാശ എജന്‍സിയായ നാസ ചൊവ്വ പര്യവേക്ഷണത്തിനായി അയച്ച ക്യൂരിയോസിറ്റി എന്ന റാവറിനെക്കുറിച്ച് എല്ലാവരും കേട്ടിരിക്കും.  2012ല്‍ ആണ് ക്യൂരിയോസിറ്റി ചൊവ്വയില്‍ എത്തുന്നത്. തുടര്‍ന്ന് നാസയുടെ തന്നെ പെഴ്‌സിവീയറന്‍സ് ദൗത്യത്തിന്റെ ഭാഗമായി പുതിയ റോവറും ഇന്‍ജെന്യൂയിറ്റി എന്ന ഹെലിക്കോപ്റ്ററും ചൊവ്വയിലെത്തി. അടുത്തയിടെ ക്യൂരിയോസിറ്റി റോവര്‍ ചൊവ്വയില്‍നിന്ന് ഒരു ചിത്രമെടുത്ത് ഭൂമിയിലേക്കയച്ചു. ചിത്രമെന്തിന്റെയാണന്നല്ലേ... ഒരു പൂവിന്റെ ചിത്രം! ലോകം അമ്പരന്നു. ചൊവ്വയിലും പൂ വിരിഞ്ഞോ..?! 

 

ചൊവ്വയിലേത് വെറും പൂവായിരുന്നില്ല... പൂവിന്റെ ഘടനയില്‍ ചൊവ്വയുടെ ഉപരിതലത്തിലുള്ള ഒരു ധാതു നിക്ഷേപത്തിന്റെ ചിത്രമായിരുന്നു അത്. ഒരു സെന്റിമീറ്റര്‍ വീതിയും സ്‌പോഞ്ചിന്റ സാദൃശ്യവുമുള്ള ഈ ഘടനയാണിതിന്. ചൊവ്വയിലെ മൗണ്ട് ഷാര്‍പ്പ് (Mount Sharp/Aeolis mons) എന്നു വിളിപ്പേരുള്ള മേഖലയില്‍ നിന്നാണു ഇതിന്റെ ചിത്രം പകര്‍ത്തിയത്. ബ്ലാക്ക്‌തോണ്‍ സോള്‍ട്ട് (Blackthorn Salt) എന്നാണ് ഈ ധാതുനിക്ഷേപത്തിന് ശാസ്ത്രജ്ഞര്‍ പേര് നല്‍കിയിരിക്കുന്നത്. പ്രാചീന കാലത്തെ ജലനിക്ഷേപത്തില്‍നിന്നും അടിഞ്ഞ ധാതുനിക്ഷേപമാവാം ഇതെന്നാണ് കരുതപ്പെടുന്നത്. ക്യൂരിയോസിറ്റി റോവറിലുള്ള മാര്‍സ് ഹാന്‍ഡ് ലെന്‍സ് ഇമേജര്‍ എന്ന പ്രത്യേക കാമറ ഉപയോഗിച്ചാണു ചിത്രം പകര്‍ത്തിയത്.

ചൊവ്വയിലെ ജീവന്റെ സാന്നിധ്യം, സാധ്യത ഒക്കെയാണ് ക്യൂരിയോസിറ്റി അന്വേഷിക്കുന്നത്.

ഭൗതികശാസ്ത്ര നോബല്‍ 2020 : തമോഗര്‍ത്ത ഗവേഷണത്തില്‍ ശ്രദ്ധേയ സംഭാവനകള്‍ക്ക്

റോജര്‍ പെന്റോസ് (Roger Penrose), ആന്‍ഡ്രിയ ഗെസ്  (Andrea Ghez),  

റെയ്‌നാഡ് ഗെന്‍സല്‍  (Reinhard Genzel),

തമോഗര്‍ത്ത ഗവേഷണത്തില്‍ ശ്രദ്ധേയ സംഭാവനകള്‍ നല്‍കിയ റോജര്‍ പെന്റോസ് (Roger Penrose), റെയ്‌നാഡ് ഗെന്‍സല്‍  (Reinhard Genzel), ആന്‍ഡ്രിയ ഗെസ്  (Andrea Ghez) എന്നീ ശാസ്ത്രജ്ഞര്‍ ഈ വര്‍ഷത്തെ ഭൗതികശാസ്ത്ര നോബല്‍ സമ്മാനം പങ്കുവച്ചു. പുരസ്‌കാരത്തിന്റെ നേര്‍പകുതി പെന്റോസിനും ബാക്കി മറ്റു 2 പേര്‍ക്കുമായാണു നല്‍കുന്നത്. ജര്‍മനിയിലെ മാക്‌സ് പ്ലാങ്ക് ഇന്‍സ്റ്റിറ്റ്യൂട്ടിലെ ഗവേഷകനായ ഗെന്‍സലും യുഎസിലെ കലിഫോര്‍ണിയ സര്‍വകലാശാലയിലെ ഗവേഷകയായ ആന്‍ഡ്രിയ ഗെസും സൗരയൂഥത്തിന്റെ മധ്യഭാഗത്തു നിലനില്‍ക്കുന്ന അതീവ പിണ്ഡമുള്ള തമോഗര്‍ത്തം കണ്ടെത്തിയതിലൂടെയാണ് പുരസ്‌കാരത്തിനര്‍ഹരായത്. ഭൗതികശാസ്ത്രനോബല്‍ നേടുന്ന നാലാമത്തെ വനിതയാണ് ആന്‍ഡ്രിയ ഗെസ്.

തമോഗര്‍ത്തങ്ങളുടെ ഉദ്ഭവം, നിലനില്‍പ്പ് എന്നിവയെക്കുറിച്ചു ഗണിതശാസ്ത്രപരമായ സിദ്ധാന്തങ്ങള്‍ ആവിഷ്‌കരിക്കുന്നതിനു തുടക്കമിട്ടതാണ് പെന്റോസിനെ പുരസ്‌കാരത്തിനര്‍ഹനാക്കിയത്. ബ്രിട്ടനിലെ ഓക്‌സ്ഫഡ് സര്‍വകലാശാലയിലെ എമറിറ്റസ് പ്രഫസറാണിദ്ദേഹം. ലോകപ്രസിദ്ധ ശാസ്ത്രജ്ഞനായിരുന്ന സ്റ്റീഫന്‍ ഹോക്കിംഗിനോടൊപ്പം നടത്തിയ ഗവേഷണങ്ങള്‍ക്ക് 1988ല്‍ ഭൗതികശാസ്ത്രത്തിനുള്ള വുള്‍ഫ് പ്രൈസ് ലഭിച്ചിട്ടുണ്ട്. 1931 ആഗസ്റ്റ് 8ന് ഇംഗ്ലണ്ടിലെ എസ്സക്‌സിലാണ് ഇദ്ദേഹം ജനിച്ചത്.

1952 മാര്‍ച്ച് 24ന് ജര്‍മനിയിലാണ് റെയ്‌നാഡ് ഗെന്‍സല്‍ ജനിച്ചത്. ആന്‍ഡ്രിയ ഗെസ് 1965 ജൂണ്‍ 16ന് ന്യൂയോര്‍ക്കില്‍ ജനിച്ചു. 

മനുഷ്യന്റെ മൂത്രം ചന്ദ്രനില്‍ കോണ്‍ക്രീറ്റ് ഉണ്ടാക്കാന്‍ സഹായിക്കും: യൂറോപ്യന്‍ സ്‌പേസ് ഏജന്‍സി (Human urine could help make concrete on moon: European Space Agency)

Lunar base made with 3D printing. (Image: ESA)

മനുഷ്യന്റെ മൂത്രം ഉപയോഗിച്ച് ചന്ദ്രനില്‍ കോണ്‍ക്രീറ്റ് നിര്‍മിക്കാനാവുമെന്നും അത് ഉപയോഗിച്ച് ചന്ദ്രനില്‍ വാസസ്ഥലം പണിയാന്‍ സാധിച്ചേക്കുമെന്നും കണ്ടെത്തിയിരിക്കുകയാണ് യൂറോപ്യന്‍ സ്‌പേസ് ഏജന്‍സിയുടെ ഒരു ഗവേഷണ പഠനം.
ലൂണാര്‍ കോണ്‍ക്രീറ്റിന് വേണ്ട മിശ്രിതം മൂത്രത്തില്‍ കണ്ടുവരുന്ന ജൈവ സംയുക്തം ഉപയോഗിച്ച് നിര്‍മിക്കാമെന്നാണ് ഗവേഷണം പറയുന്നത്. ഈ മിശ്രിതം കട്ടിയാകുന്നതിന് മുമ്പ് ഏത് രൂപത്തിലേക്കും മാറ്റാനാവും വിധം മയമുള്ളതാണെന്നും പഠനം പറയുന്നു. ജിയോപോളിമര്‍ മിശ്രിതമാണ് ലൂണാര്‍ കോണ്‍ക്രീറ്റ്. ഇത് കോണ്‍ക്രീറ്റിന് സമാനമാണ്. ഈ മിശ്രിതത്തിലേക്ക് യൂറിയ ചേര്‍ത്തപ്പോള്‍ മറ്റ് പ്ലാസ്റ്റിസൈസറുകളേക്കാള്‍ മികച്ചരീതിയില്‍ പ്രവര്‍ത്തിച്ചുവെന്നും ഇതുവഴി ജലത്തിന്റെ ആവശ്യകത പരിഹരിക്കാനാവുമെന്നും പഠനം പറയുന്നു. ഈ മിശ്രിതം ഒരു ത്രിഡി പ്രിന്ററിലൂടെ കടത്തിവിട്ട് പ്രിന്റ് ചെയ്‌തെടുത്ത സാമ്പിള്‍ ശക്തമാണെന്നും പ്രവര്‍ത്തനക്ഷമമാണെന്നും തെളിയിച്ചതായി യൂറോപ്യന്‍ സ്‌പേസ് എജന്‍സി. വെള്ളത്തിന് ശേഷം മനുഷ്യ മൂത്രത്തില്‍ ഏറ്റവും കൂടുതല്‍ അടങ്ങിയിരിക്കുന്ന ഘടകമാണ് യൂറിയ. യൂറിയയ്ക്ക് ഹൈഡ്രജന്‍ ബോണ്ടുകള്‍ തകര്‍ക്കാനും ദ്രാവക മിശ്രിതങ്ങളുടെ ശാന്യത (വിസ്‌കോസിറ്റി) കുറയ്ക്കാനും കഴിയും. കാല്‍സ്യം ധാതുക്കളും മൂത്രത്തില്‍ അടങ്ങിയിട്ടുണ്ട്. എന്തായാലും ഈ പുതിയ ചേരുവ അടങ്ങുന്ന കുമ്മായക്കൂട്ട് ശാസ്ത്രലോകത്തിന്റെ സമ്മതി പിടിച്ചുപറ്റിയിട്ടുണ്ട്.

സൂര്യന്റെ അരികുകളില്‍ തീനാമ്പുകള്‍ ജ്വലിക്കുന്നു, സോളാര്‍ ഓര്‍ബിറ്റ് പകര്‍ത്തിയ ഏറ്റവും പുതിയ ചിത്രങ്ങള്‍

അരികുകളില്‍ തീനാമ്പുകള്‍ ജ്വലിക്കുന്ന സൂര്യന്റെ ഏറ്റവും പുതിയ ചിത്രങ്ങള്‍ നാസ പ്രസിദ്ധീകരിച്ചു. സൂര്യന്റെ ഇതുവരെയുള്ളതില്‍ ഏറ്റവും അടുത്തുനിന്നുള്ള ചിത്രങ്ങള്‍. യൂറോപ്യന്‍ സ്‌പെയ്‌സ് ഏജന്‍സിയും നാസയും പകര്‍ത്തിയ ചിത്രങ്ങളാണിവ.

യൂറോപ്യന്‍ സ്‌പെയ്‌സ് ഏജന്‍സി ഫെബ്രുവരിയില്‍ കേപ് കാനാവെറലില്‍ നിന്ന് വിക്ഷേപിച്ച സോളാര്‍ ഓര്‍ബിറ്റ് പകര്‍ത്തിയ ആദ്യ ചിത്രങ്ങളാണിവ.
സൂര്യനില്‍നിന്ന് 4.8 കോടി മൈലുകള്‍(7.7 കോടി കിലോ മീറ്റര്‍) അകലെയാണ് ഓര്‍ബിറ്ററിന്റെ സ്ഥാനം. ഏകദേശം ഭൂമിയ്ക്കും സൂര്യനും ഇടയിലുള്ള ദൂരത്തിന്റെ നേര്‍പകുതിയിലാണിത്. നമ്മള്‍ കണ്ടു പരിചയിച്ച അരുണവര്‍ണത്തിന് പകരം മഞ്ഞ, ചാരനിറങ്ങളുള്ള ജ്വാലകളാണ് സൂര്യന് ഈ ചിത്രങ്ങളില്‍. ചെറിയ ചെറിയ തീനാമ്പുകളെക്കുറിച്ച് ഗവേഷണത്തിനൊരുങ്ങുകയാണ് ശാസ്ത്രജ്ഞര്‍.

ബഹിരാകാശത്ത് ആദ്യമായി ദ്രവ്യത്തിന്റെ അഞ്ചാമത്തെ അവസ്ഥ ശാസ്ത്രജ്ഞര്‍ കണ്ടെത്തി.

ബഹിരാകാശത്ത് അഞ്ചാം ദ്രവ്യാവസ്ഥ കണ്ടെത്തി. ബോസ്‌ഐന്‍സ്റ്റീന്‍ കണ്ടെന്‍സേറ്റെന്നറിയപ്പെടുന്ന ഈ അവസ്ഥ ക്വാണ്ടം പ്രപഞ്ചത്തിലെ എക്കാലത്തുംകുഴപ്പിക്കുന്ന ചില സമസ്യകളുടെ ചുരുളഴിക്കാന്‍ സഹായിക്കുമെന്നാണ് ശാസ്ത്രജ്ഞര്‍ വിലയിരുത്തുന്നത്.
അന്താരാഷ്ട്ര ബഹിരാകാശനിലയത്തില്‍ നാസയിലെ ഒരുസംഘം ശാസ്ത്രജ്ഞര്‍ നടത്തിയ ബോസ്‌ഐന്‍സ്റ്റീന്‍ കണ്ടെന്‍സേറ്റ് (ബി.ഇ.സി.) പരീക്ഷണത്തിലാണ് പുതിയ കണ്ടെത്തല്‍.
പ്രപഞ്ചവികാസത്തിന് ആക്കംകൂട്ടുന്ന ഇപ്പോഴും നിഗൂഢമായി തുടരുന്ന ശ്യാമോര്‍ജത്തെപ്പറ്റി(ഡാര്‍ക്ക് എന്‍ജി) കൂടുതല്‍ സൂചനകള്‍ നല്‍കാനും ഈ കണ്ടെത്തല്‍ വഴിതെളിക്കുമെന്ന് ഗവേഷണസംഘത്തെ നയിക്കുന്ന ശാസ്ത്രജ്ഞന്‍ ഡേവിഡ് ആല്‍വിന്‍ അഭിപ്രായപ്പെട്ടു..
ഇന്ത്യന്‍ ശാസ്ത്രജ്ഞന്‍ സത്യേന്ദ്രനാഥ ബോസും ആല്‍ബര്‍ട്ട് ഐന്‍സ്റ്റീനും ചേര്‍ന്ന് 1924'25 ലാണ് ദ്രവ്യത്തിന്റെ അഞ്ചാമത്തെ അവസ്ഥ (ബോസ്‌ഐന്‍സ്റ്റീന്‍ കണ്ടെന്‍സേറ്റ്) ആദ്യമായി പ്രവചിച്ചത്.

Nobel prize 2019: ഭൗതിക ശാസ്ത്ര നോബല്‍ കനേഡിയന്‍ അമേരിക്കക്കാരനായ ശാസ്ത്രകാരന്‍ ജെയിംസ് പീബിള്‍സ്, സ്വിസ് ശാസ്ത്രജ്ഞരായ മിഷേല്‍ മേയര്‍, ദിദിയെ ക്വലോസ് എന്നിവര്‍ക്ക്

Didier Queloz, James Peebles and Michel Mayor

കനേഡിയന്‍ അമേരിക്കക്കാരനായ ശാസ്ത്രകാരന്‍ ജെയിംസ് പീബിള്‍സ് (James Peebles), സ്വിസ് ശാസ്ത്രജ്ഞരായ മിഷേല്‍ മേയര്‍ (Michel Mayor), ദിദിയെ ക്വലോസ് (Didier Queloz) എന്നിവര്‍ക്ക് 2019 ലെ ഭൗതികശാസ്ത്ര നോബല്‍. പ്രപഞ്ചവികാസം സംബന്ധിച്ച പഠനത്തിന് ജെയിംസ് പീബിള്‍സ് സമ്മാനത്തിന്റെ നേര്‍പകുതിക്ക് അര്‍ഹനായപ്പോള്‍, സൗരയൂഥത്തിനു പുറത്ത് സൂര്യസമാനമായ നക്ഷത്രത്തെയും അതിനെ വലയം ചെയ്യുന്ന ഗ്രഹത്തെയും സംബന്ധിച്ച ഗവേഷണത്തിന് മിച്ചേല്‍ മേയറും ദിദിയെ ക്വലോസും പുരസ്‌കാരത്തിന്റെ മറുപകുതിക്ക് അര്‍ഹരായി.

വോളൊകോപ്റ്റര്‍ (Volocopter)

കാര്‍ ടാക്‌സി വിളിക്കുന്നതുപോലെ ഇനി ചെറു വിമാന ടാക്‌സി വിളിച്ച് യാത്രപോകുന്നതിനെക്കുറിച്ച് സ്വപ്നം കാണാറുണ്ടോ? 
അതിനി സ്വപ്നമല്ല, യാഥാര്‍ത്ഥ്യമാണ്!
ലോകം വളരുംതോറും യാത്രാ മാര്‍ഗങ്ങളില്‍ വിപ്ലവകരമായ മാറ്റങ്ങളാണുണ്ടായിക്കൊണ്ടിരിക്കുന്നത്. ചെറിയ ദൂരങ്ങളില്‍ ചെലവു കുറച്ച് ആകാശമാര്‍ഗം സഞ്ചരിക്കാവുന്ന ഡ്രോണ്‍ അധിഷ്ഠിതമായ യാത്രാമാര്‍ഗങ്ങളെക്കുറിച്ചുള്ള പരീക്ഷണങ്ങള്‍ ലോകമെമ്പാടും നടക്കുന്നുണ്ട്. ബാറ്ററിയില്‍ പറക്കുന്ന എയര്‍ ടാക്‌സിയായ വോളൊകോപ്റ്ററിന്റെ ആദ്യ പരീക്ഷണപ്പറക്കലിന് ജര്‍മന്‍ നഗരമായ സ്റ്റുട്ഗര്‍ട്ട് അടുത്തയിടെ സാക്ഷിയായി. വൈദ്യുത എയര്‍ ടാക്‌സിക്കായി ഏതെങ്കിലും യൂറോപ്യന്‍ നഗരത്തില്‍ നടത്തുന്ന ആദ്യ പരീക്ഷണപ്പറക്കലാണിതെന്ന് നിര്‍മാതാക്കളായ വോളൊകോപ്റ്റര്‍ ജിഎംബിഎച്ച് വ്യക്തമാക്കി. യുഎസ് ആസ്ഥാനമായ ഇന്റര്‍ കോര്‍പറേഷന്റെയും ജര്‍മന്‍ വാഹന നിര്‍മാതാക്കളായ ഡെയ്മ്‌ലര്‍ എജിയുടെയും പിന്തുണ വോളൊകോപ്റ്ററിനുണ്ട്.
വന്‍നഗരങ്ങളിലെ ഹ്രസ്വദൂര യാത്രകള്‍ക്കായി ഡ്രോണിനു സമാനമായ വൈദ്യുത ഹെലികോപ്റ്ററാണു വോളൊകോപ്റ്റര്‍ വികസിപ്പിക്കുന്നത്. അടുത്ത അഞ്ചു വര്‍ഷത്തിനകം വോളൊകോപ്റ്റര്‍ വാണിജ്യാടിസ്ഥാനത്തിലുള്ള സര്‍വീസിനു സജ്ജമാവുമെന്നാണു നിര്‍മാതാക്കളുടെ പ്രതീക്ഷ. മൊബൈല്‍ ആപ്ലിക്കേഷന്‍ വഴിയാവും പറക്കും ടാക്‌സിയുടെ ബുക്കിങ്ങ്.
18 റോട്ടര്‍ സഹിതമെത്തുന്ന ഈ പറക്കും ടാക്‌സിയില്‍ രണ്ടു സീറ്റാണുള്ളത്. ഇതിലൊന്നു വൈമാനികനും മറ്റേത് യാത്രികനുമാവാം. അതല്ല, വിദൂര സംവേദന സംവിധാനത്തിലോ വൈമാനിക സഹായമില്ലാതെ സ്വന്തം നിലയില്‍ പറക്കുന്ന രീതിയിലോ ആണു പ്രവര്‍ത്തനമെങ്കില്‍ ഈ സീറ്റുകള്‍ യാത്രികര്‍ക്ക് ഉപയോഗിക്കാം. കാര്യമായ ശബ്ദം സൃഷ്ടിക്കാതെ പ്രവര്‍ത്തിക്കുന്നതുകൊണ്ട് ശബ്ദമലിനീകരണ പ്രശ്‌നവുമില്ലത്രേ!

അകന്നുപോയ ചാന്ദ്രദൗത്യം

ച​ന്ദ്ര​യാ​ന്‍-2 ചാ​ന്ദ്ര​ദൗ​ത്യ​ത്തി​ന്‍റെ ഭാ​ഗ​മാ​യു​ള്ള വി​ക്രം ലാ​ന്‍​ഡ​റി​ന്‍റെ ലാ​ന്‍​ഡിം​ഗ് വി​ജ​യ​ക​ര​മാ​യി​ല്ല. ലാ​ന്‍​ഡ​റു​മാ​യു​ള്ള ആ​ശ​യ​വി​നി​മ​യം ന​ഷ്ട​മാ​യെ​ന്ന് ഐ​എ​സ്ആ​ര്‍​ഒ ചെ​യ​ര്‍​മാ​ന്‍  പറഞ്ഞു. റ​ഫ് ബ്രേ​ക്കിം​ഗി​നു ശേ​ഷം ഫൈ​ന്‍ ലാ​ന്‍​ഡി​ങ്ങി​നി​ടെ സാ​ങ്കേ​തി​ക പ്ര​ശ്‌​ന​ങ്ങ​ള്‍ അ​ഭി​മു​ഖീ​ക​രി​ച്ച​തോ​ടെ​യാ​ണ് ലാ​ന്‍​ഡിം​ഗ് പ്ര​ക്രി​യ ത​ട​സ​പ്പെ​ട്ട​ത്.

ച​ന്ദ്ര​നി​ൽ നി​ന്ന് 2.1 കി.​മീ മാ​ത്രം അ​ക​ലെ​വ​ച്ച് വി​ക്രം ലാ​ൻ​ഡ​റി​ൽ നി​ന്നു​ള്ള സി​ഗ്ന​ൽ ന​ഷ്ട​മാ​യെ​ന്നും വി​വ​ര​ങ്ങ​ൾ പ​രി​ശോ​ധി​ച്ച് വ​രി​ക​യാ​ണെ​ന്നും ഐ​എ​സ്ആ​ര്‍​ഒ ചെ​യ​ര്‍​മാ​ന്‍ കൂ​ട്ടി​ച്ചേ​ർ​ത്തു. 37 ശ​ത​മാ​നം മാ​ത്രം വി​ജ​യ​സാ​ധ്യ​ത ക​ണ​ക്കാ​ക്കി​യ സോ​ഫ്റ്റ് ലാ​ൻ​ഡിം​ഗ് ഏ​റെ ശ്ര​മ​ക​ര​മാ​യ ഘ​ട്ട​മാ​യി​രു​ന്നു. ശ​നി​യാ​ഴ്ച പു​ല​ർ​ച്ചെ 1.52ന് ​ലാ​ൻ​ഡിം​ഗ് പ്ര​ക്രി​യ തു​ട​ങ്ങി​യെ​ങ്കി​ലും പി​ന്നീ​ട് സി​ഗ്ന​ൽ ല​ഭി​ക്കാ​

തെ വ​രി​ക​യാ​യി​രു​ന്നു.