എല്ലൊടിഞ്ഞാല്‍ പേടിക്കേണ്ട... പ്രിന്റ് ചെയ്‌തെടുക്കാം...!

ഭൂമിയില്‍ ജനസംഖ്യ കൂടുന്നതനുസരിച്ച് മറ്റ് വാസസ്ഥലങ്ങള്‍ അന്വേഷിക്കുന്നതില്‍ ശാസ്ത്രലോകം ശ്രദ്ധ ചെലുത്തിത്തുടങ്ങിയിട്ടുണ്ട്. വിവിധ സ്‌പേസ് യാത്രാ പരിപാടികളൊക്കെ ഇതിന്റെ മുന്നോടിയാണെന്നു കരുതാം. കൂടാതെ ചൊവ്വയിലും മറ്റും മനുഷ്യനെ എത്തിക്കാനും കോളനികള്‍ സ്ഥാപിക്കാനും മറ്റും ശ്രമങ്ങള്‍ തുടരുകയാണ് താനും. ഇതിനും പുറമേ സ്‌പേസ് എന്നത് മനുഷ്യന്‍ നിത്യം കഴിച്ചു കൂട്ടുന്ന ഒരിടമായി മാറിയിട്ടുമുണ്ട്. ബഹിരാകാശ നിലയത്തിലൊക്കെ നിരന്തരം മനുഷ്യന്‍ താമസിച്ച് പരീക്ഷണ നിരീക്ഷങ്ങള്‍ നടത്തുന്ന കാര്യവും ഏവര്‍ക്കും അറിയുന്നതാണല്ലോ. ഇപ്രകാരം മനുഷ്യന്‍ സ്‌പേസിലും മറ്റ് ഗ്രഹങ്ങളിലുമൊക്കെ സാമസിക്കാന്‍ പ്രാപ്തനാകേണ്ടത് കാലത്തിന്റെ ആവശ്യകതയാണെന്ന് ചുരുക്കം.

ഇതിനിടയിലാണ് മനുഷ്യന്റെ എല്ല് 3D പ്രിന്റ് ചെയ്‌തെടുത്തുകൊണ്ട് ശാസ്ത്രജ്ഞര്‍ വീണ്ടും രംഗത്തെത്തിയത്. 

സീറോ ഗ്രാവിറ്റിയിലും അതിനു താഴെയുമൊക്കെ കഴിയേണ്ടിവരുന്ന ബഹിരാകാശ യാത്രകര്‍ക്കും മറ്റും എല്ലുകള്‍ ദുര്‍ബലമാകാനും എളുപ്പം പൊട്ടിപ്പോകാനും മറ്റുമുള്ള സാധ്യതയുണ്ട്. അതിനു പരിഹാര മാണ് പുതിയ കണ്ടെത്തല്‍. നെതര്‍ലന്‍ഡ്‌സിലെ നൂര്‍വിക്കിലുള്ള (Noordwijk) യൂറോപ്യന്‍ സ്‌പേസ് റിസര്‍ച്ച് ആന്‍ഡ് ടെക്‌നോളജി സെന്റര്‍ ആണ് കണ്ടെത്തല്‍ നടത്തിയത്. പ്രത്യേക സാഹചര്യത്തില്‍ ബഹിരാകാശത്തായിരിക്കുമ്പോള്‍ ഏതെങ്കിലും എല്ലുകള്‍ തകരാറിലായാല്‍ ഉടന്‍ ഈ സംവിധാനം ഉപയോഗിച്ച് പുതിയ എല്ലുകള്‍ പ്രിന്റ് ചെയ്‌തെടുക്കുയേ വേണ്ടൂ...!
എത്ര നല്ല ആശയം, അല്ലേ?!

ചൂടനെ ഫോട്ടോയിലാക്കി സോളോ

സൂര്യനെ അടുത്തു കാണാന്‍ മനുഷ്യന്‍ പരിശ്രമം തുടങ്ങിയിട്ട് കാലം കുറേയായി. എന്നാല്‍ ശതകോടി സെല്‍ഷ്യസില്‍ വെന്തുരുകി നില്‍ക്കുന്ന ആ ചൂടന്‍ നക്ഷത്രത്തിന്റെ ഏഴയലത്ത് അടുക്കാന്‍ ആര്‍ക്കുമായില്ല. ഇപ്പോഴിതാ സൂര്യന് പരമാവധി അടുത്തെത്തി കിടിലന്‍ ചിത്രങ്ങള്‍ പകര്‍ത്തിയിരിക്കുന്നു!

ആരാണ് ഈ സാഹസം കാണിച്ചതെന്നല്ലേ? യൂറോപ്യന്‍ ബഹിരാകാശ ഏജന്‍സി (European Space Agency) വികസിപ്പിച്ച ബഹിരാകാശ പേടകമായ സോളാര്‍ ഓര്‍ബിറ്റര്‍ ( Solar Orbiter)  ആണ് ഈ ചിത്രങ്ങള്‍ പകര്‍ത്ത് ലോകത്തെ വിസ്മയിപ്പിച്ചിരിക്കുന്നത്. ഈ ഓര്‍ബിറ്ററിന് സോളോ (SolO) എന്നാണ് ചെല്ലപ്പേര്. സൂര്യനെ നിരീക്ഷിക്കുന്നതിനും പഠനങ്ങള്‍ നടത്തുന്നതിനും വേണ്ടി 2020 ഫെബ്രുവരി 10നാണ് സോളോ വിക്ഷേപിക്കപ്പെട്ടത്.

2022 മാര്‍ച്ച് 7ന് സോളോ എടുത്ത സൂര്യന്റെ 25 ചിത്രങ്ങള്‍ സംയോജിപ്പിച്ചാണ് ഇപ്പോള്‍ പുറത്തുവിട്ടിരിക്കുന്നത്. മനുഷ്യന് ഇതുവരെ ലഭിച്ചിട്ടുള്ളതില്‍ ഏറ്റവും മിഴിവേറിയ സൂര്യചിത്രങ്ങളാണിവ. സോളോയില്‍ ഘടിപ്പിച്ചിരിക്കുന്ന എക്‌സ്ട്രീം അള്‍ട്രാവയലറ്റ് ഇമേജര്‍ (Extreme Ultraviolet Imager (EUI)) എന്ന സംവിധാനം ഉപയോഗിച്ചാണ് ചിത്രങ്ങള്‍ പകര്‍ത്തിയത്. സൂര്യന്റെ പൂര്‍ണരൂപവും വാതകനിബദ്ധമായ ബാഹ്യാന്തരീക്ഷമായ കൊറോണയും (Corona) ഒക്കെ ഈ ചിത്രത്തില്‍ പതിഞ്ഞിരിക്കുന്നു.

സോളോ സൂര്യന് അടുത്തെത്തി ചിത്രമെടുത്തു എന്നൊക്കെ പറയുമ്പോള്‍ അത് ഏകദേശം 75 ദശലക്ഷം കിലോമീറ്റര്‍ അകലെ നിന്നാണ് എന്നു കൂടി ഓര്‍ക്കണം കേട്ടോ!

നാസയുടെ മാര്‍സ് ദൗത്യം ലാന്‍ഡിങ് വീഡിയോ കാണാം.

മനുഷ്യന്റെ മൂത്രം ചന്ദ്രനില്‍ കോണ്‍ക്രീറ്റ് ഉണ്ടാക്കാന്‍ സഹായിക്കും: യൂറോപ്യന്‍ സ്‌പേസ് ഏജന്‍സി (Human urine could help make concrete on moon: European Space Agency)

Lunar base made with 3D printing. (Image: ESA)

മനുഷ്യന്റെ മൂത്രം ഉപയോഗിച്ച് ചന്ദ്രനില്‍ കോണ്‍ക്രീറ്റ് നിര്‍മിക്കാനാവുമെന്നും അത് ഉപയോഗിച്ച് ചന്ദ്രനില്‍ വാസസ്ഥലം പണിയാന്‍ സാധിച്ചേക്കുമെന്നും കണ്ടെത്തിയിരിക്കുകയാണ് യൂറോപ്യന്‍ സ്‌പേസ് ഏജന്‍സിയുടെ ഒരു ഗവേഷണ പഠനം.
ലൂണാര്‍ കോണ്‍ക്രീറ്റിന് വേണ്ട മിശ്രിതം മൂത്രത്തില്‍ കണ്ടുവരുന്ന ജൈവ സംയുക്തം ഉപയോഗിച്ച് നിര്‍മിക്കാമെന്നാണ് ഗവേഷണം പറയുന്നത്. ഈ മിശ്രിതം കട്ടിയാകുന്നതിന് മുമ്പ് ഏത് രൂപത്തിലേക്കും മാറ്റാനാവും വിധം മയമുള്ളതാണെന്നും പഠനം പറയുന്നു. ജിയോപോളിമര്‍ മിശ്രിതമാണ് ലൂണാര്‍ കോണ്‍ക്രീറ്റ്. ഇത് കോണ്‍ക്രീറ്റിന് സമാനമാണ്. ഈ മിശ്രിതത്തിലേക്ക് യൂറിയ ചേര്‍ത്തപ്പോള്‍ മറ്റ് പ്ലാസ്റ്റിസൈസറുകളേക്കാള്‍ മികച്ചരീതിയില്‍ പ്രവര്‍ത്തിച്ചുവെന്നും ഇതുവഴി ജലത്തിന്റെ ആവശ്യകത പരിഹരിക്കാനാവുമെന്നും പഠനം പറയുന്നു. ഈ മിശ്രിതം ഒരു ത്രിഡി പ്രിന്ററിലൂടെ കടത്തിവിട്ട് പ്രിന്റ് ചെയ്‌തെടുത്ത സാമ്പിള്‍ ശക്തമാണെന്നും പ്രവര്‍ത്തനക്ഷമമാണെന്നും തെളിയിച്ചതായി യൂറോപ്യന്‍ സ്‌പേസ് എജന്‍സി. വെള്ളത്തിന് ശേഷം മനുഷ്യ മൂത്രത്തില്‍ ഏറ്റവും കൂടുതല്‍ അടങ്ങിയിരിക്കുന്ന ഘടകമാണ് യൂറിയ. യൂറിയയ്ക്ക് ഹൈഡ്രജന്‍ ബോണ്ടുകള്‍ തകര്‍ക്കാനും ദ്രാവക മിശ്രിതങ്ങളുടെ ശാന്യത (വിസ്‌കോസിറ്റി) കുറയ്ക്കാനും കഴിയും. കാല്‍സ്യം ധാതുക്കളും മൂത്രത്തില്‍ അടങ്ങിയിട്ടുണ്ട്. എന്തായാലും ഈ പുതിയ ചേരുവ അടങ്ങുന്ന കുമ്മായക്കൂട്ട് ശാസ്ത്രലോകത്തിന്റെ സമ്മതി പിടിച്ചുപറ്റിയിട്ടുണ്ട്.

ബഹിരാകാശത്ത് ആദ്യമായി ദ്രവ്യത്തിന്റെ അഞ്ചാമത്തെ അവസ്ഥ ശാസ്ത്രജ്ഞര്‍ കണ്ടെത്തി.

ബഹിരാകാശത്ത് അഞ്ചാം ദ്രവ്യാവസ്ഥ കണ്ടെത്തി. ബോസ്‌ഐന്‍സ്റ്റീന്‍ കണ്ടെന്‍സേറ്റെന്നറിയപ്പെടുന്ന ഈ അവസ്ഥ ക്വാണ്ടം പ്രപഞ്ചത്തിലെ എക്കാലത്തുംകുഴപ്പിക്കുന്ന ചില സമസ്യകളുടെ ചുരുളഴിക്കാന്‍ സഹായിക്കുമെന്നാണ് ശാസ്ത്രജ്ഞര്‍ വിലയിരുത്തുന്നത്.
അന്താരാഷ്ട്ര ബഹിരാകാശനിലയത്തില്‍ നാസയിലെ ഒരുസംഘം ശാസ്ത്രജ്ഞര്‍ നടത്തിയ ബോസ്‌ഐന്‍സ്റ്റീന്‍ കണ്ടെന്‍സേറ്റ് (ബി.ഇ.സി.) പരീക്ഷണത്തിലാണ് പുതിയ കണ്ടെത്തല്‍.
പ്രപഞ്ചവികാസത്തിന് ആക്കംകൂട്ടുന്ന ഇപ്പോഴും നിഗൂഢമായി തുടരുന്ന ശ്യാമോര്‍ജത്തെപ്പറ്റി(ഡാര്‍ക്ക് എന്‍ജി) കൂടുതല്‍ സൂചനകള്‍ നല്‍കാനും ഈ കണ്ടെത്തല്‍ വഴിതെളിക്കുമെന്ന് ഗവേഷണസംഘത്തെ നയിക്കുന്ന ശാസ്ത്രജ്ഞന്‍ ഡേവിഡ് ആല്‍വിന്‍ അഭിപ്രായപ്പെട്ടു..
ഇന്ത്യന്‍ ശാസ്ത്രജ്ഞന്‍ സത്യേന്ദ്രനാഥ ബോസും ആല്‍ബര്‍ട്ട് ഐന്‍സ്റ്റീനും ചേര്‍ന്ന് 1924'25 ലാണ് ദ്രവ്യത്തിന്റെ അഞ്ചാമത്തെ അവസ്ഥ (ബോസ്‌ഐന്‍സ്റ്റീന്‍ കണ്ടെന്‍സേറ്റ്) ആദ്യമായി പ്രവചിച്ചത്.

അകന്നുപോയ ചാന്ദ്രദൗത്യം

ച​ന്ദ്ര​യാ​ന്‍-2 ചാ​ന്ദ്ര​ദൗ​ത്യ​ത്തി​ന്‍റെ ഭാ​ഗ​മാ​യു​ള്ള വി​ക്രം ലാ​ന്‍​ഡ​റി​ന്‍റെ ലാ​ന്‍​ഡിം​ഗ് വി​ജ​യ​ക​ര​മാ​യി​ല്ല. ലാ​ന്‍​ഡ​റു​മാ​യു​ള്ള ആ​ശ​യ​വി​നി​മ​യം ന​ഷ്ട​മാ​യെ​ന്ന് ഐ​എ​സ്ആ​ര്‍​ഒ ചെ​യ​ര്‍​മാ​ന്‍  പറഞ്ഞു. റ​ഫ് ബ്രേ​ക്കിം​ഗി​നു ശേ​ഷം ഫൈ​ന്‍ ലാ​ന്‍​ഡി​ങ്ങി​നി​ടെ സാ​ങ്കേ​തി​ക പ്ര​ശ്‌​ന​ങ്ങ​ള്‍ അ​ഭി​മു​ഖീ​ക​രി​ച്ച​തോ​ടെ​യാ​ണ് ലാ​ന്‍​ഡിം​ഗ് പ്ര​ക്രി​യ ത​ട​സ​പ്പെ​ട്ട​ത്.

ച​ന്ദ്ര​നി​ൽ നി​ന്ന് 2.1 കി.​മീ മാ​ത്രം അ​ക​ലെ​വ​ച്ച് വി​ക്രം ലാ​ൻ​ഡ​റി​ൽ നി​ന്നു​ള്ള സി​ഗ്ന​ൽ ന​ഷ്ട​മാ​യെ​ന്നും വി​വ​ര​ങ്ങ​ൾ പ​രി​ശോ​ധി​ച്ച് വ​രി​ക​യാ​ണെ​ന്നും ഐ​എ​സ്ആ​ര്‍​ഒ ചെ​യ​ര്‍​മാ​ന്‍ കൂ​ട്ടി​ച്ചേ​ർ​ത്തു. 37 ശ​ത​മാ​നം മാ​ത്രം വി​ജ​യ​സാ​ധ്യ​ത ക​ണ​ക്കാ​ക്കി​യ സോ​ഫ്റ്റ് ലാ​ൻ​ഡിം​ഗ് ഏ​റെ ശ്ര​മ​ക​ര​മാ​യ ഘ​ട്ട​മാ​യി​രു​ന്നു. ശ​നി​യാ​ഴ്ച പു​ല​ർ​ച്ചെ 1.52ന് ​ലാ​ൻ​ഡിം​ഗ് പ്ര​ക്രി​യ തു​ട​ങ്ങി​യെ​ങ്കി​ലും പി​ന്നീ​ട് സി​ഗ്ന​ൽ ല​ഭി​ക്കാ​

തെ വ​രി​ക​യാ​യി​രു​ന്നു.

ബാക്റ്റീരിയ സാന്നിധ്യം തിരിച്ചറിയാന്‍ പുതിയ മാര്‍ഗവുമായി ഐഐറ്റി

ബാക്റ്റീരിയയുടെ സാന്നിധ്യം തിരിച്ചറിയാന്‍ ഇനി എളുപ്പമാണ്. ഗുവാഹതി ഐഐറ്റിയുടെ (IIT - Indian Institute of Technology) പുതിയ കണ്ടെത്തല്‍ അതിനുള്ളതാണ്. ഐഐറ്റി പുതിയതായി വികസിപ്പിച്ച കൈയില്‍ കൊണ്ടുനടക്കാവുന്ന ഒരുപകരണം കുറഞ്ഞ ചിലവില്‍ കുറച്ചു സമയം കൊണ്ട് ബാക്റ്റീരിയകളുടെ സാന്നിധ്യം തിരിച്ചറിയും.

 പ്രത്യേകിച്ച് മൈക്രോബയോളജിക്കല്‍ പരിശോധനകളൊന്നും ഇവിടെ ആവശ്യമില്ല എന്നുള്ളതാണ് മെച്ചം. സാധാരണ ഇത്തരം കാര്യങ്ങള്‍ ലബോറട്ടറികളില്‍ പരിശോധന നടത്തുമ്പോള്‍ പല ദിവസങ്ങളെടുക്കും. പെട്ടെന്ന് ആവശ്യമായ ചികിത്സയും മറ്റും നല്‍കാന്‍ ഇതുമൂലം കഴിയാതെ വരുന്നുണ്ട്. എന്നാല്‍ പുതിയ ഉപകരണം, രക്തത്തിലെ പഞ്ചസാരയും മറ്റും കണ്ടെത്തുന്നതിനുള്ള ഡിജിറ്റല്‍ ഉപകരണങ്ങള്‍ പോലെ, വളരെ പെട്ടെന്ന് ബാക്റ്റീരിയകളെ കണ്ടെത്തും.
ഗുവാഹതി ഐഐറ്റി രസതന്ത്ര വിഭാഗത്തിലെ പ്രൊഫസര്‍ പരമേശ്വര്‍ കെ. അയ്യര്‍, ബയോസയന്‍സ് വിഭാഗത്തിലെ പ്രൊഫസര്‍ സിദ്ധാര്‍ത്ഥ എസ്. ഘോഷ് എന്നിവരുടെ നേതൃത്വത്തിലാണ് ഈ നേട്ടം കൈവരിച്ചത്. ആരോഗ്യരംഗത്തും പരിസ്ഥിതി സംബന്ധമായ ഗവേഷണങ്ങളിലും പ്രതിരോധ രംഗത്തും ഒക്കെ ഇതിന് വലിയ സാധ്യകളാണുള്ളത്.

മുന്‍ ഐഎസ്ആര്‍ഒ മേധാവി കിരണ്‍കുമാറിന് ഫ്രാന്‍സിന്റെ പരമോന്നത ബഹുമതി.

ISRO മേധാവിയായിരുന്ന എ. എസ്. കിരണ്‍കുമാറിന് ഫ്രാന്‍സിന്റെ പരമോന്നത ബഹുമതി. നാഷണല്‍ ഓര്‍ഡര്‍ ഓഫ് ദി ലീജിയന്‍ ഓഫ് ഓര്‍ണര്‍ (National Order of the Legion of Honour) എന്ന ബഹുമതിയാണ് കിരണ്‍കുമാറിന് ലഭിച്ചത്. ബഹിരാകാശ ബവേഷണ രംഗത്ത് ഇന്ത്യയും ഫ്രാന്‍സും തമ്മിലുള്ള സഹകരണം വര്‍ധിപ്പിക്കുന്നതിന് നല്‍കിയ സംഭാവനകള്‍ കണക്കിലെടുത്താണ് ഈ ബഹുമതി. മംഗള്‍യാന്‍ ദൗത്യത്തിന്റെ ശില്‍പികളിലൊരാളായിരുന്നു  എ. എസ്. കിരണ്‍കുമാര്‍. കര്‍ണാടക സ്വദേശിയായ ഇദ്ദേഹം അഹ്മദാബാദിലെ സ്‌പേസ് ആപ്‌ളിക്കേഷന്‍ സെന്റര്‍ ഡയറക്ടറായിരുന്നു. ബാംഗ്‌ളൂര്‍ യൂനിവേഴ്‌സിറ്റിയില്‍നിന്ന് ഇലക്ട്രോണിക്‌സില്‍ എം.എസ്സിയും ബംഗളൂരു ഇന്ത്യന്‍ ഇന്‍സ്റ്റിറ്റ്യൂട്ട് സയന്‍സില്‍നിന്ന് ഫിസിക്കല്‍ എന്‍ജിനീയറിങ്ങില്‍ എം.ടെക്കും നേടി. 1975ലാണ് ഐ.എസ്.ആര്‍.ഒയില്‍ ചേര്‍ന്നത്.

ചന്ദ്രയാന്‍ 2 പേടകത്തില്‍ നിന്നയച്ച ചന്ദ്രന്റെ ആദ്യ ചിത്രം ഐഎസ്ആർഒ പുറത്തുവിട്ടു.

ചന്ദ്രയാന്‍ 2 പേടകത്തില്‍ നിന്നയച്ച ചന്ദ്രന്റെ ആദ്യ ചിത്രം ഇസ്രൊ പുറത്തുവിട്ടു. ഓഗസ്റ്റ് 21ന് പേടകത്തിലെ 'വിക്രം' ലാന്‍ഡറിലെ ക്യാമറയെടുത്ത ചിത്രമാണ് ഇസ്രൊ ട്വീറ്റ് ചെയ്തത്. ഈ ചിത്രം ചന്ദ്രന്റെ ഉപരിതലത്തില്‍ നിന്ന് ഏകദേശം 2650 കിലോമീറ്റര്‍ അകലെ നിന്നെടുത്തതാണ്.
ചന്ദ്രനിലെ പ്രശസ്തമായ മെറെ ഓറിയന്റല്‍ തടവും അപ്പോളോ വിള്ളലും കൃത്യമായി രേഖപ്പെടുത്തിയാണ് ചിത്രം ഇസ്രൊ പുറത്തുവിട്ടത്. 'കിഴക്കന്‍ സമുദ്രം' എന്നാണ് മെറെ ഓറിയന്റലിന്റെ ലാറ്റിന്‍ പേര്. ലക്ഷക്കണക്കിനു വര്‍ഷങ്ങള്‍ക്കു മുന്‍പുണ്ടായ അഗ്‌നിപര്‍വത സ്‌ഫോടനങ്ങളില്‍ രൂപപ്പെട്ടതാണ് ഇതെന്നാണ് സൂചന.

വിക്രം സാരാഭായിയുടെ 100-ാം ജന്മദിനം

ഇന്ത്യന്‍ ബഹിരാകാശ പദ്ധതിയുടെ പിതാവ് എന്നറിയപ്പെടുന്ന വിക്രം സാരാഭായ് 1919 ഓഗസ്റ്റ് 12-നു ഗുജറാത്തിലെ അഹമ്മദാബാദില്‍ ഒരു ധനിക ജൈന കുടുംബത്തില്‍ ജനിച്ചു. പ്രാഥമിക വിദ്യാഭ്യാസം അഹമ്മദാബാദിലും ഉന്നത വിദ്യാഭ്യാസം കേംബിഡ്ജിലുമായിരുന്നു. 1947-ല്‍ കോസ്മിക് റേകളെക്കുറിച്ച് ഗവേഷണം ചെയ്ത് കേംബ്രിഡ്ജില്‍ നിന്ന് പി.എച്ച്.ഡി നേടി. തുടര്‍ന്ന് അഹമ്മദാബാദിലെ ഫിസിക്കല്‍ റിസേര്‍ച്ച് ലാബോറട്ടറിയില്‍ കോസ്മിക് റേയെക്കുറിച്ച് പഠിപ്പിക്കുന്ന ഫിസിക്‌സ് പ്രൊഫസ്സറായി. പിന്നീട് 1965-ല്‍ അവിടുത്തെ ഡയറക്ടറുമായി. ഇതിനിടെ ഇന്ത്യയിലെ അണുശക്തി കമ്മീഷനില്‍ അദ്ദേഹം നിയമിതനായി. ഉപഗ്രഹ വിക്ഷേപണത്തില്‍ അദ്ദേഹം പ്രത്യേകം താല്പര്യം കാട്ടി.ബഹിരാകാശഗവേഷണത്തെ വെറും ശൂന്യാകാശ യാത്രകളായി വഴിതിരിച്ചു വിടാതെ ,വാര്‍ത്താവിനിമയത്തിനും കാലാവസ്ഥാ നിരീക്ഷണത്തിനും ഉപയോഗപ്രദമാക്കുക എന്നതായിരുന്നു അദ്ദേഹത്തിന്റെ ലക്ഷ്യം തുമ്പയിലെ ബഹിരാകാശകേന്ദ്രത്തിന്റെ ശില്പി ഇദ്ദേഹമാണ്. അദ്ദേഹത്തോടുള്ള ബഹുന്മാനാര്‍ത്ഥം തുമ്പ റോക്കറ്റ് വിക്ഷേപണകേന്ദ്രത്തെ ''വിക്രം സാരാഭായ് സ്‌പേസ് സെന്റര്‍'' എന്ന് നാമകരണം ചെയ്തു.

ചന്ദ്രയാന്‍ 2 കുതിച്ചുയര്‍ന്നു

ലോകത്തിന് മുന്‍പില്‍ ഇന്ത്യയുടെ അഭിമാനമായുര്‍ത്തിക്കൊണ്ട് രണ്ടാം ചാന്ദ്ര ദൗത്യത്തിന് തുടക്കമായി. 2019 ജൂലൈ 22ന് ശ്രീഹരിക്കോട്ടയിലെ സതീഷ് ധവാന്‍ സ്‌പെയ്‌സ് സെന്ററില്‍നിന്ന് ചന്ദ്രയാന്‍ 2 വിക്ഷേപിച്ചു. ജിഎസ്എല്‍വി മാര്‍ക്ക് 3 റോക്കറ്റിലാണ് വിക്ഷേപണം. 48 ദിവസത്തിനകം സെപ്റ്റംബര്‍ ഏഴിന് ചന്ദ്രയാനിലെ വിക്രം ലാന്‍ഡര്‍ ചന്ദ്രനിലിറങ്ങുമെന്നും ഐഎസ്ആര്‍ഒ വ്യക്തമാക്കി. 2008 ഒക്ടോബറിലായിരുന്നു ചന്ദ്രയാന്‍1 ദൗത്യം ചന്ദ്രനെ ലക്ഷ്യമാക്കി കുതിച്ചത്. 11 വര്‍ഷത്തിനു ശേഷം ഇപ്പോഴിതാ ചന്ദ്രയാന്‍ 2 യാഥാര്‍ത്ഥ്യമായിരിക്കുന്നു. ഏകദേശം 978 കോടി രൂപയാണ് പദ്ധതി ചെലവ്. ചന്ദ്രനെ വലംവെക്കുന്ന ഓര്‍ബിറ്റര്‍, ചന്ദ്രോപരിതലത്തിലേക്ക് ഇറങ്ങുന്ന ലാന്‍ഡര്‍ (വിക്രം), പര്യവേക്ഷണം നടത്തുന്ന റോവര്‍ (പ്രഗ്യാന്‍) എന്നിവയടങ്ങിയതാണ് ഈ ദൗത്യം.

ഇന്ത്യന്‍ നാവിഗേഷന്‍ ഉപഗ്രഹശൃംഖലയിലെ അഞ്ചാം കണ്ണിയും തയാര്‍

ഗതി നിര്‍ണയ ഉപഗ്രഹ ശ്രേണിയിലെ അഞ്ചാമത്തെ ഉപഗ്രഹവും വിജയകരമായി വിക്ഷേപിച്ചുകൊണ്ട് ഇന്ത്യ തദ്ദേശീയമായ ജിപിഎസ് എന്ന ലക്ഷ്യത്തിലേക്ക് ഒരുപടി കൂടി മുന്നേറി. ഐആര്‍എന്‍എസ്എസ് - 1ഇ എന്ന ഉപഗ്രഹത്തിന്റെ വിക്ഷേപണമാണ് ശ്രീഹരിക്കോട്ടയില്‍ നടന്നത്. പിഎസ്എല്‍വി-31 റോക്കറ്റിലായിരുന്നു വിക്ഷേപണം.

സ്വന്തം നാവിഗേഷന്‍ സംവിധാനത്തിനായി ഏഴ് ഉപഗ്രഹങ്ങളടങ്ങിയ ശൃംഖലയാണ് ഐഎസ്ആര്‍ഒ പദ്ധതിയിട്ടിരിക്കുന്നത്. ഇതിന് ഇന്ത്യ റീജണല്‍ നാവിഗേഷന്‍ സാറ്റലൈറ്റ് സിസ്റ്റം () എന്നാണ് പേര്. ഈ പദ്ധതിയില്‍പ്പെട്ട ആദ്യ ഉപഗ്രഹം, ഐആര്‍എന്‍എസ്എസ് - 1എ 2013 ജൂലൈയിലാണ് വിക്ഷേപിച്ചത്. നാലാമത്തേത് (ഐആര്‍എന്‍എസ്എസ് - 1ഡി) 2015 മാര്‍ച്ചിലും. 

നിലവില്‍ അമേരിക്കയുടെ ജിപിഎസ് ശൃംഖലയും റഷ്യയുടെ ഗ്ലോനാസ്സുമാണ് ഗതിനിര്‍ണയത്തിനായി ലോകരാജ്യങ്ങളെല്ലാം തന്നെ ഉപയോഗപ്പെടുത്തുന്നത്. ഈ വര്‍ഷം അവസാനത്തോടെ ഐആര്‍എന്‍എസ്എസ് സംവിധാനം പൂര്‍ണ തോതില്‍ പ്രവര്‍ത്തനക്ഷമമാകുന്നതോടെ നമ്മുടെ രാജ്യത്തിന് സ്വന്തം ഗതിനിര്‍ണയ സംവിധാനം ഉപയോഗപ്പെടുത്താനാകും.

ബഹിരാകാശത്തും പൂ വിരിഞ്ഞു.

ബഹിരാകാശത്ത് വസന്തം വിരിഞ്ഞു.! സംശയിക്കേണ്ട, ബഹിരാകാശത്ത് പൂ വിരിഞ്ഞിരിക്കുന്നു. ഓറഞ്ച് നിറത്തിലുള്ള സീനിയ പൂവാണ് ബഹിരാകാശത്ത് വിരിഞ്ഞ ആദ്യ പുഷ്പമെന്ന വിശേഷണത്തിനര്‍ഹമായത്. നാസ ശാസ്ത്രജ്ഞന്‍ സ്‌കോട്ട് കെല്ലിയാണ് പൂവിന്റെ ചിത്രം ട്വിറ്ററിലൂടെ ലോകത്തെ കാണിച്ചത്. 

അന്താരാഷ്ട്ര ബഹിരാകാശ നിലയത്തിലെ വെജി ലാബിലാണ് ഈ പുഷ്പം വിരിഞ്ഞത്. ലാബില്‍ ചുവപ്പ്, പച്ച, നീല നിറങ്ങളിലുള്ള എല്‍ഇഡി ലൈറ്റുകള്‍ ഉപയോഗിച്ച് സൂര്യപ്രകാശത്തിന്റെ പ്രതീതിയുണ്ടാക്കിയാണ് ചെടി വളര്‍ത്തിയെടുത്തത്. 2014 മെയ് മാസത്തിലാണ് ഇത്തരത്തിലൊരു ലാബ് അന്താരാഷ്ട്ര ബഹിരാകാശ നിലയത്തില്‍ സ്ഥാപിച്ചത്. സൂര്യപ്രകാശവും ഗുരുത്വാകര്‍ണവുമൊന്നുമില്ലാത്ത അവസ്ഥയില്‍ എങ്ങനെ ചെടികള്‍ വളര്‍ത്താം എന്ന പഠനമായിരുന്നു ലക്ഷ്യം. ചീരയിനത്തിലുള്ള ഒരു ചെടി ആദ്യം നട്ടെങ്കിലും അത് വിജയിച്ചില്ല. എന്നാല്‍ രണ്ടാമതൊന്ന് വിജയത്തിലെത്തിയിരുന്നു. 

ഏതായാലും ബഹിരാകാശത്ത് പച്ചക്കറികളും മറ്റും നന്നായി വളര്‍ത്തിയെടുക്കാനായാല്‍ ശാസ്ത്രജ്ഞര്‍ക്ക് അവിടെ കൂടുതല്‍ കാലം തങ്ങി പരീക്ഷണങ്ങളും മറ്റും നടത്താനുള്ള സാഹചര്യമുണ്ടാവും. കൂടാതെ ബഹിരാകാശത്തേക്കും മറ്റും കുടിയേറാനുള്ള സാഹചര്യങ്ങളും തെളിഞ്ഞു വരികയാണ്!

ജിസാറ്റ് 15 ഭ്രമണപഥത്തില്‍

ഇന്ത്യയുടെ അത്യാധുനിക വാര്‍ത്താവിനിമയ ഉപഗ്രഹം ജിസാറ്റ് 15 വിജയകരമായി വിക്ഷേപിച്ചു.

 ഫ്രഞ്ച് ഗയാനയിലെ കൗറുവില്‍ നിന്നായിരുന്നു വിക്ഷേപണം. 3164 കിലോഗ്രം ഭാരമുള്ളതാണ് ഈ ഉപഗ്രഹം. 24 വാര്‍ത്താവിനിമയ ട്രാന്‍സ്‌പോണ്ടറുകള്‍ ഈ ഉപഗ്രഹത്തിലുണ്ട്. 12 വര്‍ഷമാണ് പ്രവര്‍ത്തനകാലാവധി കണക്കാക്കിയിരിക്കുന്നത്.

പ്രപഞ്ചത്തിലേക്കൊരു ഇന്ത്യന്‍ കണ്ണ് - ആസ്‌ട്രോസാറ്റ്

ഇന്ത്യയുടെ ആദ്യ ജ്യോതിശാസ്ത്ര നിരീക്ഷണ ഉപഗ്രഹമായ ആസ്‌ട്രോസാറ്റ് വിജയകരമായി വിക്ഷേപിച്ചു. ശ്രീഹരിക്കോട്ടയിലെ സതീഷ് ധവാന്‍ സ്‌പേസ് സെന്ററില്‍നിന്ന് പിഎസ്എല്‍വി-സി 30 റോക്കറ്റിലായിരുന്നു വിക്ഷേപണം.

നാസയുടെ ഹബിള്‍ ടെലിസ്‌കോപിന് സമാനമായ നിരീക്ഷണ ഉപഗ്രഹമാണ് ആസ്‌ട്രോസാറ്റ്. 1513 കാലോഗ്രാം ഭാരം. 'പ്രപഞ്ചത്തിലേക്ക് ഇന്ത്യ തുറന്നു വയ്ക്കുന്ന കണ്ണ്' എന്നാണ് ഐഎസ്ആര്‍ഒ ഈ പേടകത്തെ വിശേഷിപ്പിക്കുന്നത്. വിവിധ തരംഗദൈര്‍ഘ്യങ്ങളിലുള്ള സിഗ്നലുകള്‍ ഉപയോഗിച്ച് നക്ഷത്രങ്ങളെക്കുറിച്ചും അവയിലെ ഊര്‍ജോല്‍പാദന ത്തെക്കുറിച്ചും തമോഗര്‍ത്തങ്ങളെക്കുറിച്ചുമൊക്കെ പഠിക്കുകയാണ് ഈ ദൗത്യത്തിന്റെ ലക്ഷ്യം. ഭൂമിയില്‍നിന്ന് 650 കിലോമീറ്റര്‍ ഉയരത്തിലുള്ള നിയര്‍ ഇക്വറ്റോറിയല്‍ ഭ്രമണപഥത്തിലാണ് ഉപഗ്രഹം ചലിക്കുക. അഞ്ച് വര്‍ഷമാണ് ഈ പേടകത്തിന് ആയുസ്സ് പ്രതീക്ഷിക്കുന്നത്. 

അള്‍ട്രാവയലറ്റ് ഇമേജിംഗ് ടെലിസ്‌കോപ് (UVIT), ലാര്‍ജ് ഏരിയ എക്‌സ്-റേ പ്രൊപോഷണല്‍ കൗണ്ടര്‍ (LAXPC), സോഫ്റ്റ് എക്‌സ്-റേ ടെലിസ്‌കോപ് (SXT), കാഡ്മിയം സിങ്ക് ടെല്യുറൈഡ് ഇമേജര്‍ (CZTI), സ്‌കാനിംഗ് സ്‌കൈ മോനിറ്റര്‍ (SSM) എന്നീ സംവിധാനങ്ങള്‍ ഈ സ്‌പേസ് ഒബ്‌സര്‍വേറ്ററിയിലുള്‍ ക്കൊള്ളിച്ചിട്ടുണ്ട്‌. മറ്റ് സ്‌പേസ് ഒബ്‌സര്‍വേറ്ററികളില്‍നിന്ന് വ്യത്യസ്തമായി വിവിധ തരംഗ ദൈര്‍ഘ്യമുള്ള രശ്മികളെ പഠനവിധേയമാക്കാന്‍ ആസ്‌ട്രോസാറ്റിന് കഴിയും.

ആസ്‌ട്രോസാറ്റിനൊപ്പം ഇന്തോനേഷ്യ, കാനഡ എന്നീ രാജ്യങ്ങളുടെ രണ്ട് ഉപഗ്രഹങ്ങളും അമേരിക്കയുടെ നാല് നാനോ ഉപഗ്രഹങ്ങളും ഇന്ത്യ ബഹിരാകാശത്തെത്തിച്ചു.

മംഗള്‍യാന്‍ ചൊവ്വയെക്കണ്ടിട്ട് ഒരു വര്‍ഷം...!

ഇന്ത്യയുടെ മംഗള്‍യാന്‍ ചൊവ്വയുടെ ഭ്രമണപഥത്തിലെത്തിയിട്ട് ഒരു വര്‍ഷം പൂര്‍ത്തിയായി.

2014 സെപ്റ്റംബര്‍ 24നായിരുന്നു മംഗള്‍യാന്‍ ചുവന്ന ഗ്രഹത്തിന്റെ ഭ്രമണപഥത്തിലെത്തിയത്. അന്നാണ് റഷ്യയ്ക്കും, അമേരിക്കയ്ക്കും, യൂറോപ്യന്‍ യൂണിയനും ശേഷം നമ്മുടെ രാജ്യം അഭിമാനകരമായ ആ നേട്ടം കൈവരിക്കുന്ന നാലാമത്തെ ബഹിരാകാശ ശക്തിയായത്. അതും ആദ്യ ശ്രമത്തില്‍ത്തന്നെ ഈ നേട്ടം കൈവരിക്കുന്ന ലോകത്തെ ആദ്യ രാജ്യവും നമ്മള്‍ തന്നെ.

മംഗള്‍യാന്‍ എടുത്ത ചെവ്വയുടെ ചില ചിത്രങ്ങള്‍

മംഗള്‍യാന്‍ എടുത്ത ചെവ്വയുടെ ചിത്രങ്ങളടങ്ങിയ ഒരു അറ്റ്‌ലസ് ഇതിനോടനുബന്ധിച്ച് ഐഎസ്ആര്‍ഒ പുറത്തിറക്കി. 2013 നവംബര്‍ 5നാണ് ശ്രീഹരിക്കോട്ടയില്‍നിന്ന് മംഗള്‍യാന്‍ വിക്ഷേപിക്കപ്പെട്ടത്. ആദ്യം ആറുമാസം മാത്രം കാലാവധി കല്‍പ്പിക്കപ്പെട്ടിരിക്കുന്ന മംഗള്‍യാന്‍ ഇപ്പോഴും പൂര്‍ണ അരോഗ്യത്തോടെയാണുള്ളതെന്നും ഇനിയും പല വര്‍ഷങ്ങലിലേക്ക് പ്രവര്‍ത്തിക്കാനുള്ള ഇന്ധനം വാഹനത്തില്‍ ബാക്കിയുണ്ടെന്നും ഐഎസ്ആര്‍ഒ  അറിയിച്ചു.

ഐആര്‍എന്‍എസ്എസ് - ഇന്ത്യന്‍ ജിപിഎസ്!

ഐആര്‍എന്‍എസ്എസ് (IRNSS) അഥവാ ഇന്ത്യന്‍ റീജണല്‍ നാവിഗേഷന്‍ സാറ്റലൈറ്റ് സിസ്റ്റം പ്രവര്‍ത്തനക്ഷമമാകുന്നു.

2015 മാര്‍ച്ച് 28-ാം തീയതി നടന്ന IRNSS 1-D സാറ്റലൈറ്റ് വിക്ഷേപണത്തോടെയാണിത് സാധ്യമായത്. പിഎസ്എല്‍വി സി-27 റോക്കറ്റിലായിരുന്നു വിക്ഷേപണം. ഐഎസ്ആര്‍ഒ യുടെ പുതിയ ചെയര്‍മാന്‍ എ. എസ്. അരുണ്‍കുമാര്‍ ചുമതലയേറ്റ ശേഷം നടക്കുന്ന ആദ്യ വിക്ഷേപണമായിരുന്നു ഇത്. 

അമേരിക്കയുടെ ജി.പി.എസ്. (GPS) സംവിധാനത്തിന്റെ ഇന്ത്യന്‍ പതിപ്പ് എന്നാണിത് അറിയപ്പെടുന്നത്. ജിപിഎസ് ആഗോള കവറേജ് നല്‍കുമ്പോള്‍ IRNSS റീജണല്‍ കവറേജാണിപ്പോള്‍ സാധ്യമാക്കിയിരിക്കുന്നത് എന്ന വ്യത്യാസം മാത്രം. ഏഴ് സാറ്റലൈറ്റുകള്‍ അടങ്ങിയ IRNSS സീരീസിലെ നാലാമത്തെ സാറ്റലൈറ്റാണ് ഇപ്പോള്‍ വിക്ഷേപിക്കപ്പെട്ടിരിക്കുന്നത്. ഇത് പൂര്‍ത്തിയാകുമ്പോള്‍ ലോകം മുഴുവന്‍ ഇതിന്റെ കീഴില്‍ വരും. ഈ ശ്രേണിയിലെ ആദ്യ ഉപഗ്രഹം IRNSS-1A ജൂലൈ 1, 2013നും രണ്ടാമത്തേത് IRNSS -1B ഏപ്രില്‍ 4, 2014നും മൂന്നാമത്തേത് IRNSS -1C ഒക്ടോബര്‍ 16, 2014നും വിക്ഷേപിച്ചിരുന്നു.