ഒരു മലയാളി വിമാനക്കഥ!

ഇതാ ഒരു മലയാളി സ്വന്തമായി വിമാനം നിര്‍മിച്ച് ലോകശ്രദ്ധയാകര്‍ഷിക്കുന്നു. ലണ്ടനില്‍ ജോലി ചെയ്യുന്ന മലയാളി എന്‍ജിനീയറായ അശോക് താമരാക്ഷന്‍ ആണ് താരം. മുന്‍ എംഎല്‍എ പ്രഫ. എ. വി. താമരാക്ഷന്റെയും ഡോ. സുഹൃദലതയുടെയും മകനാണിദ്ദേഹം. നാലുപേര്‍ക്കു യാത്ര ചെയ്യാവുന്ന വിമാനമാണ് ഇദ്ദേഹം നര്‍മിച്ചിരിക്കുന്നത്. 7 മണിക്കൂര്‍ തുടര്‍ച്ചയായി പറക്കാന്‍ കഴിയുന്നതാണിത്. ഇദ്ദേഹം ബ്രിട്ടിഷ് സിവില്‍ ഏവിയേഷന്‍ അതോറിറ്റിയില്‍നിന്നു ലൈസന്‍സ് ലഭിച്ചിട്ടുള്ള പൈലറ്റ് കൂടിയാണ്. 

2019 മേയില്‍ ലണ്ടനിലെ വീട്ടില്‍ താല്‍ക്കാലിക വര്‍ക്ഷോപ് നിര്‍മിച്ചു തുടങ്ങിയ വിമാന നിര്‍മാണം 2021 നവംബറില്‍ പൂര്‍ത്തിയായി. തുടര്‍ന്ന് 3 മാസത്തെ പരീക്ഷണ പറക്കലുകള്‍ക്കൊടുവില്‍ അശോകിന്റെ വിമാനത്തിന് പറക്കാനുള്ള അനുമതി കിട്ടി. 

ഇദ്ദേഹം ഇതിനകം കുടുംബത്തോടൊപ്പം തന്റെ സ്വന്തം വിമാനത്തില്‍ ജര്‍മനി, ഫ്രാന്‍സ്, ഇറ്റലി തുടങ്ങിയ രാജ്യങ്ങളിലേക്കും പറന്നുകഴിഞ്ഞു. ഇളയ മകള്‍ ദിയയുടെ പേരിനൊപ്പം ബ്രിട്ടനിലെ വിമാനങ്ങളുടെ ഐക്കണ്‍ ആയ ജി ചേര്‍ത്ത് ജി-ദിയ (G-Diya) എന്നാണു വിമാനത്തിനു പേരിട്ടത്.

സ്വന്തമായി വിമാനം നിര്‍മിച്ച മലയാളിയേക്കുറിച്ച് നിങ്ങള്‍ മുന്‍പ് കേട്ടിട്ടുണ്ട്. കേള്‍വി സംസാര വൈകല്യമുള്ള, അടിസ്ഥാന വിദ്യഭ്യാസം മാത്രമുള്ള, സജി തോമസ് എന്ന ഇടുക്കിക്കാരനാണ് മുന്‍പ് ഇപ്രകാരം വിമാനം നിര്‍മിച്ച് ലോകത്തെ ഞെട്ടിച്ചത്. 

സജി നിര്‍മിച്ച Saji X A-ir-S എന്നു പേരായ അള്‍ട്രാലൈറ്റ് വിമാനം 2014 ലാണ് ആദ്യ പറക്കല്‍ നടത്തിയത്. ഇന്ത്യന്‍ എയര്‍ഫോഴ്‌സ് റിട്ട. വിങ് കമാന്‍ഡര്‍ എസ്. കെ. ജെ. നായര്‍ ആണ് മണിമുതൂരിലെ തന്റെ ഏവിയേഷന്‍ ക്ലബില്‍ വച്ച് സജിക്ക് പറക്കലിന് അവസരമൊരുക്കിയത്. ഇന്ന് സജി ഒരു ജര്‍മന്‍ ഏവിയേഷന്‍ കമ്പനിയില്‍ ടെക്‌നീഷ്യനാണ്.

തോമസ് കപ്പില്‍ ഇന്ത്യന്‍ വസന്തം...!

രാജ്യങ്ങള്‍ മാറ്റുരയ്ക്കുന്ന ലോകത്തിലെ ഏറ്റവും പ്രമുഖമായ പുരുഷ ബാഡ്മിന്റണ്‍ ചാംപ്യന്‍ഷിപ്പായ തോമസ് കപ്പില്‍ (Thomas Cup) ഇന്ത്യയ്ക്ക് കിരീടം. കലാശപോരാട്ടത്തില്‍ ഇന്തൊനീഷ്യയെ തകര്‍ത്തെറിഞ്ഞ ഇന്ത്യന്‍ ടീം ഇതാദ്യമായി കിരീടം നേടി ചരിത്രമെഴുതി.

ഈ ചാംപ്യന്‍ഷിലുടനീളം തകര്‍പ്പന്‍ പ്രകടനം പുറത്തെടുത്ത ഇന്ത്യന്‍ ടീം ഗ്രൂപ്പ് ഘട്ടത്തില്‍  ചൈനീസ് തായ്‌പേയിയോടു മാത്രമാണ് തോല്‍വി വഴങ്ങിയത്.  ക്വാര്‍ട്ടറില്‍ മലേഷ്യയെയും സെമിയില്‍ കരുത്തരായ ഡെന്‍മാര്‍ക്കിനെയും തകര്‍ത്തു മുന്നേറിയ ഇന്ത്യ ഫൈനലില്‍ മുന്‍പ് 14 തവണ ചാംപ്യന്‍മാരായിട്ടുള്ള ഇന്തൊനേഷ്യയെ നിഷ്പ്രഭരാക്കി വിജയകിരീടമണിഞ്ഞു.
കിഡംബി ശ്രീകാന്ത്, ലക്ഷ്യ സെന്‍, എച്ച്. എസ്. പ്രണോയ് എന്നിവര്‍ സിംഗിള്‍സിലും ചിരാഗ് ഷെട്ടി, സാത്വിക് സായ്‌രാജ്, എം.ആര്‍.അര്‍ജുന്‍ എന്നിവര്‍ ഡബിള്‍സിലും ഇന്ത്യന്‍ നിരയിലുണ്ടായിരുന്നു. ഇതില്‍ പ്രണോയിയും അര്‍ജുനും മലയാളികളാണ്.
ബാഡ്മിന്റണ്‍ വേള്‍ഡ് ഫെഡറേഷന്റെ (BWF) അംഗരാജ്യങ്ങളെ പ്രതിനിധീകരിക്കുന്ന ടീമുകള്‍ തമ്മിലുള്ള അന്താരാഷ്ട്ര പുരുഷ ബാഡ്മിന്റണ്‍ മത്സരമായ തോമസ് കപ്പിന്റെ ആദ്യ ടൂര്‍ണമെന്റ് നടന്നത് 1948-1949 വര്‍ഷത്തിലാണ്. 1982 നു ശേഷം രണ്ട് വര്‍ഷത്തിലൊരിക്കലാണ് ചാമ്പ്യന്‍ഷിപ്പുകള്‍ നടത്തപ്പെടുന്നത്. 1990 കളുടെ തുടക്കത്തില്‍ ഇംഗ്ലീഷ് ബാഡ്മിന്റണ്‍ കളിക്കാരനായിരുന്ന സര്‍ ജോര്‍ജ്ജ് അലന്‍ തോമസ് (Sir George Alan Thomas) ആയിരുന്നു ഇത്തരമൊരു ചാംപ്യന്‍ഷിപ്പിന്റെ ആശയം മുന്നോട്ടു വച്ചത്. അദ്ദേഹത്തിന്റെ സ്മരണാര്‍ത്ഥമാണ് തോമസ് കപ്പ് എന്ന പേര് നല്‍കിയിരിക്കുന്നത്.

എല്ലൊടിഞ്ഞാല്‍ പേടിക്കേണ്ട... പ്രിന്റ് ചെയ്‌തെടുക്കാം...!

ഭൂമിയില്‍ ജനസംഖ്യ കൂടുന്നതനുസരിച്ച് മറ്റ് വാസസ്ഥലങ്ങള്‍ അന്വേഷിക്കുന്നതില്‍ ശാസ്ത്രലോകം ശ്രദ്ധ ചെലുത്തിത്തുടങ്ങിയിട്ടുണ്ട്. വിവിധ സ്‌പേസ് യാത്രാ പരിപാടികളൊക്കെ ഇതിന്റെ മുന്നോടിയാണെന്നു കരുതാം. കൂടാതെ ചൊവ്വയിലും മറ്റും മനുഷ്യനെ എത്തിക്കാനും കോളനികള്‍ സ്ഥാപിക്കാനും മറ്റും ശ്രമങ്ങള്‍ തുടരുകയാണ് താനും. ഇതിനും പുറമേ സ്‌പേസ് എന്നത് മനുഷ്യന്‍ നിത്യം കഴിച്ചു കൂട്ടുന്ന ഒരിടമായി മാറിയിട്ടുമുണ്ട്. ബഹിരാകാശ നിലയത്തിലൊക്കെ നിരന്തരം മനുഷ്യന്‍ താമസിച്ച് പരീക്ഷണ നിരീക്ഷങ്ങള്‍ നടത്തുന്ന കാര്യവും ഏവര്‍ക്കും അറിയുന്നതാണല്ലോ. ഇപ്രകാരം മനുഷ്യന്‍ സ്‌പേസിലും മറ്റ് ഗ്രഹങ്ങളിലുമൊക്കെ സാമസിക്കാന്‍ പ്രാപ്തനാകേണ്ടത് കാലത്തിന്റെ ആവശ്യകതയാണെന്ന് ചുരുക്കം.

ഇതിനിടയിലാണ് മനുഷ്യന്റെ എല്ല് 3D പ്രിന്റ് ചെയ്‌തെടുത്തുകൊണ്ട് ശാസ്ത്രജ്ഞര്‍ വീണ്ടും രംഗത്തെത്തിയത്. 

സീറോ ഗ്രാവിറ്റിയിലും അതിനു താഴെയുമൊക്കെ കഴിയേണ്ടിവരുന്ന ബഹിരാകാശ യാത്രകര്‍ക്കും മറ്റും എല്ലുകള്‍ ദുര്‍ബലമാകാനും എളുപ്പം പൊട്ടിപ്പോകാനും മറ്റുമുള്ള സാധ്യതയുണ്ട്. അതിനു പരിഹാര മാണ് പുതിയ കണ്ടെത്തല്‍. നെതര്‍ലന്‍ഡ്‌സിലെ നൂര്‍വിക്കിലുള്ള (Noordwijk) യൂറോപ്യന്‍ സ്‌പേസ് റിസര്‍ച്ച് ആന്‍ഡ് ടെക്‌നോളജി സെന്റര്‍ ആണ് കണ്ടെത്തല്‍ നടത്തിയത്. പ്രത്യേക സാഹചര്യത്തില്‍ ബഹിരാകാശത്തായിരിക്കുമ്പോള്‍ ഏതെങ്കിലും എല്ലുകള്‍ തകരാറിലായാല്‍ ഉടന്‍ ഈ സംവിധാനം ഉപയോഗിച്ച് പുതിയ എല്ലുകള്‍ പ്രിന്റ് ചെയ്‌തെടുക്കുയേ വേണ്ടൂ...!
എത്ര നല്ല ആശയം, അല്ലേ?!

കമ്പ്യൂട്ടര്‍ ഒരു കണ്ണാടിയാകുമ്പോള്‍... ഒരു മലയാളി വിപ്ലവം

കമ്പ്യൂട്ടറുകളെപ്പറ്റി ആലോചിക്കുമ്പോള്‍ നമ്മുടെ മനസ്സിലെത്തുന്നത് ഡെസ്‌ക്ടോപും ലാപ്‌ടോപും ടാബ്‌ലറ്റ് കമ്പ്യൂട്ടറുമൊക്കെയാണ്, അല്ലേ? ഇപ്പോഴാകട്ടെ കമ്പ്യൂട്ടറുപയോഗിച്ച് ചെയ്യാവുന്ന കുറേക്കാര്യങ്ങള്‍ ചെയ്യാന്‍ കഴിവുള്ള മൊബൈല്‍ ഫോണുകളും ലഭ്യമാണ്. എന്നാല്‍ ഇതൊന്നും ഇല്ലാതെ തന്നെ ലോകത്ത് എവിടെയിരുന്നും കംപ്യൂട്ടര്‍ ഉപയോഗിക്കാന്‍ കഴിയും! ഒരു കണ്ണട കയ്യിലുണ്ടായാല്‍ മതി..!

ഈ കണ്ണട പോലുള്ള ഉപകരണം ഒരു സ്മാര്‍ട് ഗ്ലാസ് ആണ്. ഇത് വികസിപ്പിച്ചതോ, ഒരു മലയാളി സംരംഭകനും! അമേരിക്കയിലെ കാലിഫോര്‍ണിയയിലുള്ള മില്‍പിറ്റാസ് (Milpitas) ആസ്ഥാനമായി പ്രവര്‍ത്തിക്കുന്ന സ്റ്റാര്‍ട്ടപ്പ് നിമോ പ്ലാനറ്റ് ( Nimo Planet ) എന്ന സ്ഥാപനമാണ് ഈ സ്മാര്‍ട് ഗ്ലാസിന്റെ പിന്നിലുള്ളത്.  മലപ്പുറം തിരൂര്‍ സ്വദേശി രോഹില്‍ദേവ് (Rohildev Nattukallingal) ആണ നിമോപ്ലാനറ്റിന്റെ സ്ഥാപകനും സിഇഒയും. 

Rohildev Nattukallingal

ലോകത്തെ ആദ്യത്തെ 'അള്‍ട്രാ പോര്‍ട്ടബ്ള്‍ മള്‍ട്ടി സ്‌ക്രീന്‍ കംപ്യൂട്ടര്‍' എന്ന വിശേഷണവുമായി എത്തുന്ന നിമോ സ്മാര്‍ട് ഗ്ലാസ് ഉടന്‍ വിപണിയില്‍ ലഭ്യമാകും. ഏകദേശ വില 60,000 രൂപ. ആദ്യ ഘട്ടത്തില്‍ അമേരിക്കയിലും ഇന്ത്യയിലും ലഭിക്കും. കേരളത്തില്‍ കൊച്ചിയില്‍ നിമോയുടെ ഒരു ടീം പ്രവര്‍ത്തിക്കുന്നുണ്ട്.  

പ്രഫഷനല്‍ ഉപയോഗത്തിനുള്ള സ്മാര്‍ട്ട് ഗ്ലാസുകള്‍ വളരെ അപൂര്‍വമാണിപ്പോള്‍. ഉള്ളതിന് വലിയ വിലയുമാണ്.

നിമോ സ്മാര്‍ട് ഗ്ലാസ് ധരിച്ചാല്‍ 2 മീറ്റര്‍ അകലെ ഒരു വെര്‍ച്വല്‍ സ്‌ക്രീന്‍ തുറന്നു വരും. ബ്ലൂടൂത്ത്, വൈഫൈ, മൊബൈല്‍ ഹോട്‌സ്‌പോട് എന്നിവയുമായെല്ലാം കണക്ട് ചെയ്യാം. 90 ഗ്രാം മാത്രമാണ് ഭാരം. 6 സ്‌ക്രീനുകള്‍ വരെ കാണാം. മൗസും ബ്ലൂ ടൂത്ത് കീ പാഡും ഉപയോഗിക്കാം.  

എന്തായാലും വെയറബിള്‍ കമ്പ്യൂട്ടിംഗ് രംഗത്ത് മലയാളിത്തിളക്കത്തിനായി കാത്തിരിക്കാം.

ഇനി ഒളിക്കാനാവില്ല കാന്‍സറിന്.

അര്‍ബുദം അഥവാ കാന്‍സര്‍ ആധുനിക മനുഷ്യനെ ഏറ്റവും ആശങ്കപ്പെടുത്തുന്ന ഒരു അസുഖമാണ്. അര്‍ബുദ ബാധ നേരത്തേ കണ്ടെത്തിയാല്‍ ഫലപ്രദമായി ചികിത്സിച്ച് ഭേദമാക്കുന്നതിന് ആധുനിക വൈദ്യശാസ്ത്രത്തിന് കഴിയും. പക്ഷേ പലപ്പോഴും അസുഖബാധ വളരെ താമസിച്ചാണ് കണ്ടെത്തപ്പെടുന്നത്. ഇക്കാര്യത്തില്‍ വളരെ പ്രതീക്ഷ നല്‍കുന്ന ഒരു പുതിയ ഗവേഷണ ഫലം പുറത്തുവന്നു.

കാനഡയിലെ പ്രസിദ്ധമായ വാട്ടര്‍ലൂ സര്‍വകലാശാലയാണ് (The University of Waterloo) ഈ പുതിയ കണ്ടെത്തലിന് പിന്നില്‍. അര്‍ബുദ കോശങ്ങളെ കൂടുതല്‍ കൃത്യതയോടെ കാലേകൂട്ടി കണ്ടെത്താനും വളര്‍ച്ച നിരീക്ഷിക്കാനും സാധിക്കുന്ന പുതിയ മാഗ്‌നറ്റിക് റെസണന്‍സ് ഇമേജിങ് (MRI) സാങ്കേതിക വിദ്യയാണ് അവര്‍ വികസിപ്പിച്ചിരിക്കുന്നത്. സിന്തറ്റിക് കോറിലേറ്റഡ് ഡിഫ്യൂഷന്‍ ഇമേജിങ് (synthetic correlated diffusion imaging) എന്നണിതിന് പേര് നല്‍കിയിരിക്കുന്നത്. ഈ എംആര്‍ഐ സങ്കേതം ഉപയോഗിച്ച് പരിശോധിക്കുമ്പോള്‍ കാന്‍സര്‍ ബാധിത കോശങ്ങള്‍ കൂടുതല്‍ തിളക്കമുള്ളതായി കാണപ്പെടുകയും അത് അവയുടെ വളര്‍ച്ച കൂടുതല്‍ കൃത്യതയോടെ നിരീക്ഷിക്കാന്‍ ഡോക്ടര്‍മാരെ സഹായിക്കുകയും ചെയ്യും.  
ഈ പുതിയ സാങ്കേതിക വിദ്യ അര്‍ബുദ രോഗനിര്‍ണയത്തെയും ചികിത്സയെയും മെച്ചപ്പെടുത്തുമെന്ന് വാട്ടര്‍ലൂവിലെ സിസ്റ്റംസ് ഡിസൈന്‍ എന്‍ജിനീയറിങ് പ്രഫസര്‍ അലക്‌സാണ്ടര്‍ വോങ് ( Alexander Wong ) അഭിപ്രായപ്പെട്ടു. പ്രോസ്റ്റേറ്റ് കാന്‍സര്‍ ബാധിതരായ ഇരുനൂറോളം പേരില്‍ ഈ സങ്കേതം വിജയകരമായി പരീക്ഷിച്ചു കഴിഞ്ഞു. സ്തനാര്‍ബുദ രോഗികളിലും ഈ സങ്കേതം ഉപയോഗിച്ച് മികച്ച രീതിയിലുള്ള രോഗനിര്‍ണയം നടത്താന്‍ സാധിച്ചിട്ടുണ്ട്.

മഹാമാരിയെ പിടിച്ചുകെട്ടിയ തകാഹാഷി

ഇക്കഴിഞ്ഞ ഫെബ്രുവരി മാസം 17ന് ഗൂഗിള്‍ ഒരു ഡൂഡില്‍ അവതരിപ്പിച്ചു. അതൊരു ജപ്പാന്‍കാരനെ ആദരിച്ചുകൊണ്ടുള്ളതായിരുന്നു. ലോകത്തെയാകെ ഒരു മഹാമാരിയില്‍നിന്ന് രക്ഷിക്കാന്‍ കാരണക്കാരനായ ഒരു മഹാ വ്യക്തിത്വത്തിന്റെ 94-ാം ജന്മവാര്‍ഷികമായിരുന്നു അന്ന്. അദ്ദേഹമാണ് ലോകപ്രസിദ്ധ വൈറോളജിസ്റ്റായിരുന്ന ഡോ. മിച്ചിയാകി തകാഹാഷി (Dr Michiaki Takahashi). ലോകത്താദ്യമായി ചിക്കന്‍പോക്‌സിനെതിരായ വാക്‌സിന്‍ വികസിപ്പിച്ചത് ഡോ. തകാഹാഷിയാണ്.

തന്റെ മകന് പിടിപെട്ട പകര്‍ച്ചവ്യാധിയെ ചെറുക്കാനാണ് ഡോക്ടര്‍ ഈ വാക്‌സിന്‍ വികസനത്തിന് ശ്രമങ്ങളാരംഭിച്ചത്. ഒടുവില്‍ 1974ല്‍ അദ്ദേഹം ആദ്യ ചിക്കന്‍പോക്‌സ് വാക്‌സിന്‍ വികസിപ്പിച്ചു. അതിന് ഒക (Oka) എന്നാണ് പേരിട്ടത്. പിന്നീടുള്ളത് ചരിത്രം. ലോകമെമ്പാടും ദശലക്ഷക്കണക്കിന് ആളുകളെ ഈ വാക്‌സിന്‍, രോഗത്തില്‍നിന്ന് രക്ഷിച്ചു. ചിക്കന്‍പോക്‌സിന് കാരണമാകുന്ന വാരിസെല്ല (Varicella) വൈറസിനെ നിര്‍വീര്യമാക്കുന്ന വാക്‌സിനാണ് ഡോ. തകാഹാഷി വികസിപ്പിച്ചത്. പിന്നീടിതിന് ലോകാരോഗ്യ സംഘടന അംഗീകാരം നല്‍കി.
2013 ഡിസംബര്‍ 16ന് അദ്ദേഹം ഇഹലോകവാസം വെടിഞ്ഞു.

ചിലന്തി വല നാരു കൊണ്ടുള്ള ലെന്‍സില്‍ വൈറസുകളുടെ വരെ ചിത്രം പതിയും!

തായ് വാനിലെ നാഷണല്‍ യങ്മിങ് സര്‍വകലാശാലയിലെ ചെങ്‌യങ് ലിയുവും സഹപ്രവര്‍ത്തകരും ചേര്‍ന്ന് ഡാഡി ലോങ് ലെഗ്‌സ് സ്‌പൈഡര്‍ എന്നറിയപ്പെടുന്ന ഫോല്‍കസ് ഫലാഞ്ജിയോയിഡ്‌സ് എന്ന ചിലന്തിയുടെ ഡ്രാഗ് ലൈന്‍ സില്‍ക്ക് ഉപയോഗിച്ച് ഒരു ലെന്‍സ് നിര്‍മിച്ചു.
ശരീര ചര്‍മത്തിനുള്ളിലെ ചിത്രങ്ങള്‍ ഉയര്‍ന്ന റസലൂഷനില്‍ പകര്‍ത്താന്‍ സാധിക്കുന്ന ലെന്‍സാണിത്.
ചിലന്തിവല നാര് സ്‌പൈഡര്‍ സില്‍ക്ക് എന്നാണ് അറിയപ്പെടുന്നത്. ചിലന്തി വലയ്ക്ക് ചുറ്റും 'ഫ്രെയിം' ആയി ഉപയോഗിക്കുന്ന 'ഡ്രാഗ് ലൈന്‍ സില്‍ക്ക്' എന്ന് വിളിക്കപ്പെടുന്ന പ്രത്യേക തരം നാരുണ്ട്. അതിന് ബലം കൂടുതലായിരിക്കും.
ഈ പുതിയ ലെന്‍സിന്റെ വലിപ്പം മൈക്രോമീറ്ററുകള്‍ മാത്രമാണ്. എകദേശം അരുണ രക്താണുക്കളുടെ അത്രത്തോളം വലിപ്പമുണ്ടാകും. ഈ ലെന്‍സുകളില്‍ തിളങ്ങുന്ന ലേസര്‍ പ്രകാശം പതിപ്പിച്ച് ഗവേഷര്‍ പരീക്ഷിച്ചു. അപ്പോള്‍ അത് ഫോട്ടോണിക് നാനോജെറ്റ് എന്നറിയപ്പെടുന്ന ഒരുതരം രശ്മി പുറത്തുവിട്ടു. (ലെന്‍സില്‍ നിന്നും വ്യത്യസ്ത ദൂരങ്ങളില്‍ ഫോക്കസ് ചെയ്യാന്‍ സാധിക്കുന്ന പ്രകാശത്തിന്റെ ഒരു നേര്‍ത്ത കിരണം.) ലെന്‍സിന്റെ വലിപ്പം വര്‍ധിപ്പിക്കാനും ഗവേഷകര്‍ക്ക് സാധിച്ചു.
ഇങ്ങനെ നിര്‍മിച്ച ലെന്‍സുകള്‍ കൊണ്ട് വൈറസുകള്‍ പോലെ അതി സൂക്ഷ്മ വസ്തുക്കളുടെ ചിത്രങ്ങള്‍ പകര്‍ത്താന്‍ സാധിക്കുമെന്നും ജീവനുള്ള ചര്‍മത്തിന്റെ വിശദമായ ചിത്രം പകര്‍ത്താന്‍ സാധിക്കുമെന്നും ലിയു പറഞ്ഞു.

ഈ വര്‍ഷത്തെ എസ്എസ്എല്‍സി പരീക്ഷയില്‍ 98.82 ശതമാനം വിജയം

എസ്എസ്എല്‍സി ഫലം പ്രഖ്യാപിച്ചു. ഇത്തവണത്തെ എസ്എസ്എല്‍സി വിജയ ശതമാനം കഴിഞ്ഞവര്‍ഷത്തേക്കാള്‍ 0.71% കൂടുതലാണ്.
എസ്എസ്എല്‍സി റെഗുലര്‍ വിഭാഗത്തില്‍ 4,02292 വിദ്യാര്‍ഥികള്‍ പരീക്ഷയെഴുതിയതില്‍ 4,17,101 വിദ്യാര്‍ഥികളാണ് ഉപരിപഠനത്തിന് യോഗ്യത നേടിയത്. 98.82%  ആണ്. എല്ലാവിഷയത്തിലും കഴിഞ്ഞ വര്‍ഷം 37,334 വിദ്യാര്‍ഥികള്‍ളാണ് എ പ്ലസ് നേടിയതെങ്കില്‍ ഈ വര്‍ഷം എ പ്ലസ് നേടിയ വിദ്യാര്‍ഥികളുടെ എണ്ണം 41,906 ആണ്.
ഏറ്റവും കൂടുതല്‍ വിജയ ശതമാനമുള്ള റവന്യു ജില്ല പത്തനംതിട്ടയാണ് (99.71 %). ഏറ്റവും കുറവ് വിജയ ശതമാനമുള്ള റവന്യു ജില്ല വയനാടാണ് (95.04%)
വിജയശതമാനം ഏറ്റവും കൂടുതലുള്ള വിദ്യാഭ്യാസ ജില്ല കുട്ടനാടാണ് (100%). വിജയശതമാനം ഏറ്റവും കുറവുള്ള വിദ്യാഭ്യാസ ജില്ല വയനാട് (95.04%)
ഏറ്റവു കൂടുതല്‍ വിദ്യാര്‍ഥികള്‍ക്ക് ഏറ്റവും കൂടുതല്‍ എ പ്ലസ് ലഭിച്ച വിദ്യാഭ്യാസ ജില്ല മലപ്പുറം (2,736).

ബ്രിട്ടീഷ് ധനമന്ത്രിയായി ഇന്ത്യന്‍ വംശജന്‍ ഋഷി സുനാക്.

ഇന്ത്യന്‍ വംശജനായ ഋഷി സുനാക് ബ്രിട്ടനിലെ പുതിയ ധനമന്ത്രിയായി നിയോഗിക്കപ്പെട്ടു. ഇന്‍ഫോസിസ് സഹ സ്ഥാപകന്‍ നാരായണ മൂര്‍ത്തിയുടെ മകളുടെ ഭര്‍ത്താവാണ് ഋഷി സുനാക്. ബ്രിട്ടനിലെ ആഭ്യന്തര സെക്രട്ടറിയായി നിയമിതയായ പ്രീതി പട്ടേലിനുശേഷം ഉന്നത പദവിയിലെത്തുന്ന അടുത്ത ഇന്ത്യന്‍ വംശജനാണ് അദ്ദേഹം. ബ്രിട്ടനിലെ രണ്ടാമത്തെ ഏറ്റവും വലിയ സര്‍ക്കാര്‍ പദവിയിലെത്തുന്നു ഇന്ത്യന്‍ വംശജന്‍ ഋഷി സുനാക്.

ഇന്ത്യക്കാരിയായ കാമ്യ കാര്‍ത്തികേയന് അമേരിക്കന്‍ കൊടുമുടി കീഴടക്കിയ ഏറ്റവും പ്രായം കുറഞ്ഞ വ്യക്തി എന്ന ബഹുമതി.

ദക്ഷിണ അമേരിക്കയിലെ 6962 മീറ്റര്‍ ഉയരത്തിലുള്ള കൊടുമുടിയായ അകൊന്‍കാഗ്വ കീഴടക്കി 12 കാരിയായാ ഈ ഇന്ത്യക്കാരി. മഹാരാഷ്ട്ര സ്വദേശിനിയായ കാമ്യ, അമേരിക്കന്‍ കൊടുമുടി കീഴടക്കിയ ഏറ്റവും പ്രായം കുറഞ്ഞ വ്യക്തി എന്ന ബഹുമതി നേടിയത്.

ഫെബ്രുവരി 1 നാണ് കാര്‍ത്തികേയനും മകള്‍ കാമിയയും ദക്ഷിണ അമേരിക്കന്‍ കൊടുമുടിയായ അകൊകഗ്വയിലെത്തിയത്. ഏഷ്യക്ക് പുറത്തുള്ള ഏറ്റവും വലിയ കൊടുമുടിയാണ് അകൊന്‍കഗ്വ.  അകൊന്‍കാഗ്വ അര്‍ജന്റീനയിലെ തെക്കന്‍ ആന്തീസിലാണ് സ്ഥിതിചെയ്യുന്നത്. വര്‍ഷങ്ങളായുള്ള തയ്യാറെടുപ്പുകളും കായികപരിശീലനവും നടത്തിയതിനു ശേഷമാണ് കാമിയ ഈ സാഹസിക നേട്ടം കൈവരിച്ചിരിക്കുന്നത്.
Read More

ഗോതാബയ രാജപക്‌സെ ശ്രീലങ്കന്‍ പ്രസിഡന്റ്‌

മുന്‍ പ്രസിഡന്റ് മഹിന്ദ രാജപക്സെയുടെ ഇളയ സഹോദരനും മുന്‍ പ്രതിരോധ സെക്രട്ടറിയുമായ നന്ദസേന ഗോതാബയ രാജപക്‌സെ ശ്രീലങ്കന്‍ പ്രസിഡന്റായി തിരഞ്ഞെടുക്കപ്പെട്ടു. മഹിന്ദ രാജപക്സെയുടെ ശ്രീലങ്ക പൊതുജന പെരുമന പാര്‍ട്ടി (എസ്.എല്‍.പി.പി) സ്ഥാനാര്‍ത്ഥിയായ ഗോതാബയ അറുപത് ശതമാനത്തോളം വോട്ട് നേടിയാണ് വിജയിച്ചത്. പ്രധാനമന്ത്രി റനില്‍ വിക്രമസിംഗെയുടെ യുണൈറ്റഡ് നാഷണല്‍ പാര്‍ട്ടിയുടെ (യു.എന്‍.പി) സജിത് പ്രേമദാസയായിരുന്നു പ്രധാന എതിരാളി. ശ്രീലങ്കന്‍ സര്‍ക്കാര്‍ തമിഴ്പുലികളെ തോല്പിച്ച യുദ്ധകാലത്ത് പ്രതിരോധ സെക്രട്ടറി എന്ന നിലയില്‍ ഗോതാബയ വിവാദപുരുഷനായിരുന്നു.

കനേഡിയന്‍ താരം ബെനിക്ക ആന്ദ്രീസ്‌ക്കുവിന് യു.എസ്. ഓപ്പണ്‍ വതിനാ ടെന്നിസ് കിരീടം

ഏഴാം കിരീടം ലക്ഷ്യമിട്ടുവന്ന മുപ്പത്തിയേഴുകാരിയായ സെറീനയെ അട്ടിമറിച്ച പത്തൊന്‍പതുകാരി ബെനിക്ക ആന്ദ്രീസ്‌ക്കു കിരീടം. കാനഡക്കാരിയായ ആന്ദ്രീസ്‌ക്കുവിന്റെ കന്നി ഗ്രാന്‍സ്ലാം കിരീടമാണിത്. 6-3, 7-5 എന്ന സ്‌കോറില്‍ നേരിട്ടുളള സെറ്റുകള്‍ക്കായിരുന്നു ആന്ദ്രീസ്‌ക്കുവിന്റെ
കിരീടവിജയം. ഒരു മേജര്‍ ടെന്നിസ് ടൂര്‍ണമെന്റ് സ്വന്തമാക്കുന്ന ആദ്യ കനേഡിയന്‍ താരമാണ് ആന്ദ്രീസ്‌ക്കു. മറിയ ഷറപ്പോവ വിജയിച്ചശേഷം ഒരു ഗ്രാസ്ലാം കിരീടം സ്വന്തമാക്കുന്ന ആദ്യ ടീനേജ് താരം കൂടിയാണ് ആന്ദ്രീസ്‌ക്കു.

2019ലെ ദേശീയ കായിക പുരസ്‌കാരങ്ങള്‍

Bajrang Punia

2019ലെ ദേശീയ കായിക പുരസകാരങ്ങള്‍ പ്രഖ്യാപിച്ചു. ഗുസ്തി താരം ബജ്‌രംഗ് പുനിയ (Bajrang Punia),

Deepa Malik

പാരാലിംപിക്‌സ് മെഡല്‍ ജേതാവ് ദീപാ മാലിക് (Deepa Malik) എന്നിവര്‍ രാജ്യത്തെ പരമാന്നത കായിക പുരസ്‌കാരമായ രാജീവ് ഗാന്ധി ഖേല്‍ രത്‌നയ്ക്ക് (Khel Ratna) അര്‍ഹരായി.
മൂന്ന് മലയാളികള്‍ക്ക് ഇത്തവണ പുരസ്‌കാരം ലഭിച്ചു. അത്‌ലറ്റ് മുഹമ്മദ് അനസ് യഹിയയ്ക്ക് അര്‍ജുന അവാര്‍ഡും ബാഡ്മിന്റണ്‍ കോച്ച് വിമല്‍കുമാറിന് ദ്രോണാചാര്യ പുരസ്‌കാരവും മുന്‍ ഹോക്കി താരം മാനുവല്‍ ഫ്രഡറിക്‌സിന് ധ്യാന്‍ ചന്ദ് പുരസ്‌കാരവും ലഭിച്ചു.
ഇന്ത്യന്‍ ക്രിക്കറ്റ് താരം രവീന്ദ്ര ജഡേജ, വനിതാ ക്രിക്കറ്റ് താരം പൂനം യാദവ്, കബഡി താരം അജയ് താക്കൂര്‍, കാറോട്ടക്കാരന്‍ ഗൗരവ് ഗില്‍, ഷൂട്ടിംഗ് താരം അന്‍ജും മൗദ്ഗില്‍, ഫുട്‌ബോള്‍ താരം ഗുര്‍പ്രീത് സിംഗ് സന്ധു, അത്‌ലറ്റ് സ്വപ്ന ബര്‍മന്‍, ബാഡ്മിന്റന്‍ താരം സായ് പ്രണീത് തുടങ്ങിയവര്‍ അര്‍ജുന പുരസ്‌കാര പട്ടികയിലിടം പിടിച്ചവരില്‍പ്പെടുന്നു.

ഇന്ത്യന്‍ വംശജയായ പ്രീതി പട്ടേല്‍ ബ്രിട്ടന്റെ ആഭ്യന്തര സെക്രട്ടറി

ബ്രിട്ടന്റെ ആഭ്യന്തര സെക്രട്ടറിയായി ഇന്ത്യന്‍ വംശജയായ പ്രീതി പട്ടേല്‍ (Priti Sushil Patel) സ്ഥാനമേറ്റു. നമ്മുടെ രാജ്യത്തെ കേന്ദ്ര ആഭ്യന്തര മന്ത്രിയ്ക്ക് തുല്യമായ സ്ഥാനമാണിത്. ബ്രിട്ടനില്‍ ആഭ്യന്തര മന്ത്രിയാകുന്ന ആദ്യ ഇന്ത്യന്‍ വംശജയാണ് ഇവര്‍. ബ്രിട്ടനില്‍ ജനിച്ച പ്രീതിയുടെ മാതാപിതാക്കള്‍ ഗുജറാത്തില്‍നിന്നും കുടിയേറിയവരാണ്. കണ്‍സര്‍വേറ്റീവ് പാര്‍ട്ടി പ്രതിനിധിയായ പ്രീതി ഇപ്പോഴത്തെ പ്രധാനമന്ത്രി ബോറിസ് ജോണ്‍സന്റെ പ്രധാന പിന്തുണക്കാരില്‍ ഒരാളാണ്. 2010 മുതല്‍ എസ്സക്‌സിലെ വിതാമിനെ (Witham in Essex)  പ്രതിനിധീകരിക്കുന്ന എംപിയാണ് പ്രീതി പട്ടേല്‍. 1972 മാര്‍ച്ച് 29ന് ലണ്ടനിലാണ് പ്രീതിയുടെ ജനനം.

പാരാ ബാഡ്മിന്റണ്‍ ലോക ചാമ്പ്യന്‍ഷിപ്പ് വനിതാ സിംഗിള്‍സ് കിരീടം മാനസി നയന ജോഷിക്ക്‌.

പാരാ ബാഡ്മിന്റണ്‍ ലോക ചാമ്പ്യന്‍ഷിപ്പ് വനിതാ സിംഗിള്‍സ് വിഭാഗത്തില്‍ കിരീടമുയര്‍ത്തി മാനസി. ഗുജറാത്തിലെ രാജ്‌കോട്ടില്‍നിന്നുള്ള 30-കാരിയായ മാനസി ഫൈനലില്‍ ഇന്ത്യയുടെതന്നെ പാരുള്‍ പാര്‍മറെ തോല്‍പ്പിച്ചാണ് (21-12, 21-7) കിരീടം നേടിയത്. എസ്.എല്‍. 3 വിഭാഗത്തില്‍ മൂന്ന് തവണ ലോക കിരീടം നേടിയ താരമാണ് പാരുള്‍.

ആറാം വയസ്സില്‍ ബാഡ്മിന്റണ്‍ കളി തുടങ്ങിയ മാനസി 2015-ല്‍ ലോക ചാമ്പ്യന്‍ഷിപ്പിലെ മിക്സഡ് വിഭാഗത്തില്‍ വെള്ളി നേടി.

2017-ല്‍ വനിത വിഭാഗത്തില്‍ വെങ്കലം നേടിയ താരം പി. ഗോപീചന്ദിന്റെ കീഴില്‍  പരിശീലനം നടത്തി 2019 പാര ഒളിമ്പിക്സില്‍ ഇപ്പോള്‍ സ്വര്‍ണവും നേടി. പ്രധാനമന്ത്രി അഭിനന്ദിച്ചു. കായികമന്ത്രി 20 ലക്ഷം പാരിതോഷികം പ്രഖ്യാപിച്ചു.

ലോക ബാഡ്മിന്റന്‍ ചാംപ്യന്‍ഷിപ്പില്‍ ഇന്ത്യന്‍ താരം പി.വി. സിന്ധുവിന് സ്വര്‍ണ്ണം.

ബാഡ്മിന്റണ്‍ കോര്‍ട്ടില്‍ പി.വി. സിന്ധുവെന്ന പുസര്‍ല വെങ്കിട്ട സിന്ധു ഞായറാഴ്ച രചിച്ചത് ചരിത്രം. ലോക അഞ്ചാം നമ്പര്‍ താരമായ ഈ
 ഹൈദരാബാദുകാരി, നാലാം നമ്പര്‍ താരമായ ഒകുഹാരയെ വെറും 38 മിനിറ്റിനുള്ളില്‍ വീഴ്ത്തിയാണ് വിജയമാഘോഷിച്ചത്. സ്‌കോര്‍: 21-7, 21-7.
ലോകചാംപ്യന്‍ഷിപ്പില്‍ തുടര്‍ച്ചയായി മൂന്നാംവട്ടമാണ് സിന്ധു മല്‍സരിച്ചത്. 2017 ല്‍ ഒകുഹാരയോടും 2018 ല്‍ കരോലിന മാര്‍ലിനോടും സിന്ധു പരാജയപ്പെട്ടിരുന്നു.
ലോകപ്രശസ്ത ധനകാര്യമാസികയായ ഫോബ്‌സിന്റെ 2018'-19-ലെ ഏറ്റവും വരുമാനമുള്ള വനിതാ കായികതാരങ്ങളുടെ പട്ടികയില്‍ ഇന്ത്യയില്‍നിന്ന് സിന്ധുവുണ്ട്. പുതിയ നേട്ടംകൊണ്ട് തന്റെ പേര് തങ്കലിപിയാല്‍ എഴുതുകയാണ് പുസര്‍ല വെങ്കിട്ട സിന്ധു.

ചന്ദ്രയാന്‍ 2 പേടകത്തില്‍ നിന്നയച്ച ചന്ദ്രന്റെ ആദ്യ ചിത്രം ഐഎസ്ആർഒ പുറത്തുവിട്ടു.

ചന്ദ്രയാന്‍ 2 പേടകത്തില്‍ നിന്നയച്ച ചന്ദ്രന്റെ ആദ്യ ചിത്രം ഇസ്രൊ പുറത്തുവിട്ടു. ഓഗസ്റ്റ് 21ന് പേടകത്തിലെ 'വിക്രം' ലാന്‍ഡറിലെ ക്യാമറയെടുത്ത ചിത്രമാണ് ഇസ്രൊ ട്വീറ്റ് ചെയ്തത്. ഈ ചിത്രം ചന്ദ്രന്റെ ഉപരിതലത്തില്‍ നിന്ന് ഏകദേശം 2650 കിലോമീറ്റര്‍ അകലെ നിന്നെടുത്തതാണ്.
ചന്ദ്രനിലെ പ്രശസ്തമായ മെറെ ഓറിയന്റല്‍ തടവും അപ്പോളോ വിള്ളലും കൃത്യമായി രേഖപ്പെടുത്തിയാണ് ചിത്രം ഇസ്രൊ പുറത്തുവിട്ടത്. 'കിഴക്കന്‍ സമുദ്രം' എന്നാണ് മെറെ ഓറിയന്റലിന്റെ ലാറ്റിന്‍ പേര്. ലക്ഷക്കണക്കിനു വര്‍ഷങ്ങള്‍ക്കു മുന്‍പുണ്ടായ അഗ്‌നിപര്‍വത സ്‌ഫോടനങ്ങളില്‍ രൂപപ്പെട്ടതാണ് ഇതെന്നാണ് സൂചന.

വിങ് കമാന്‍ഡര്‍ അഭിനന്ദന്‍ വര്‍ധമാന് വീര്‍ചക്ര

ഇന്ത്യന്‍ വ്യോമസേനയിലെ വിങ് കമാന്‍ഡര്‍ അഭിനന്ദന്‍ വര്‍ധമാന് (Wing Commander Abhinandan Varthaman) വീര്‍ചക്ര പുരസ്‌കാരം. യുദ്ധകാലത്ത് സൈനികര്‍ക്കു നല്‍കുന്ന പരമോന്നത ബഹുമതിയാണ് വീര്‍ചക്ര. സ്‌ക്വാര്‍ഡന്‍ ലീഡര്‍ മിന്റി അഗവര്‍വാളിന് യുദ്ധ്‌സേവ മെഡലും ലഭിച്ചു. ബാലാക്കോട്ടെ ഭീകരക്യാമ്പിനു നേരെ ഇന്ത്യ നടത്തിയ വ്യോമാക്രമണത്തിനു തിരിച്ചടി നല്‍കാന്‍ 2019 ഫെബ്രുവരി 27ന് ഇന്ത്യന്‍ വ്യോമാതിര്‍ത്തി ലംഘിച്ച പാക്കിസ്ഥാന്റെ എഫ് 16 വിമാനത്തെ മിഗ് 21 ബൈസന്‍ വിമാനത്തില്‍ പിന്തുടര്‍ന്ന അഭിനന്ദന്‍ വെടിവച്ചു വീഴ്ത്തുകയായിരുന്നു. ഈ ധീരതയ്ക്കാണ് അഭിനന്ദന് പുരസ്‌കാരം ലഭിച്ചത്. പിന്നാലെ പാക്ക് പിടിയിലായ അദ്ദേഹം 2019 മാര്‍ച്ച് ഒന്നിനു മോചിതനായി.
1983 ജൂണ്‍ 21ന് തമിഴ്‌നാട്ടിലെ കാഞ്ചീപുരത്തിനടുത്തുള്ള തിരുപനമൂര്‍ എന്ന സ്ഥലത്താണ് അഭിനന്ദന്‍ ജനിച്ചത്. വ്യോമസേനയില്‍നിന്ന് എയര്‍മാര്‍ഷല്‍ പദവിയില്‍ വിരമിച്ച സിംഹക്കുട്ടി വര്‍ധമാനും ഡോ. ശോഭയും മാതാപിതാക്കള്‍.

2019 ലെ രമണ്‍ മഗ്‌സസേ പുരസ്‌കാരം മാധ്യമപ്രവര്‍ത്തകന്‍ രവീഷ് കുമാറിന്

എന്‍ ഡി ടിവിയിലെ മുതിര്‍ന്ന മാധ്യമപ്രവര്‍ത്തകന്‍ രവീഷ് കുമാറിന് 2019 ലെ രമണ്‍ മഗ്‌സസേ പുരസ്‌കാരം. അഞ്ചുപേര്‍ക്കാണ് ഇത്തവണ പുരസ്‌കാരം ലഭിച്ചത്.
ഏഷ്യയുടെ നോബല്‍ പുരസ്‌കാരം എന്നറിയപ്പെടുന്ന രമണ്‍ മഗ്‌സസേ പുരസ്‌കാരം 1957 മുതലാണ് നല്‍കിവരുന്നത്.ഫിലിപ്പൈന്‍ പ്രസിഡന്റായിരുന്ന രമണ്‍ മഗ്‌സസേയുടെ സ്മരണാര്‍ഥമാണ് പുരസ്‌കാരം സ്ഥാപിച്ചത്.
1996 മുതല്‍ എന്‍ ഡി ടിവിയില്‍ പ്രവര്‍ത്തിക്കുന്ന രവീഷ് കുമാര്‍ പ്രൈം ടൈം എന്ന പരിപാടിയുടെ അവതാരകനാണ് മ്യാന്‍മറില്‍നിന്നുള്ള കോ സ്വി വിന്‍, തായ്‌ലന്‍ഡില്‍നിന്നുള്ള അംഗ്ഹാന നീലാപായിജിത്, ഫിലിപ്പിന്‍സില്‍നിന്നുള്ള റേയ്മണ്ടോ പുജാന്റെ കായാബ്യാബ്, ദക്ഷിണ കൊറിയയില്‍നിന്നുള്ള കിം ജോങ് കി എന്നിവരാണ് പുരസ്‌കാരം ലഭിച്ച മറ്റു നാലുപേര്‍. ആചാര്യ വിനോബാ ഭാവെ, മദര്‍ തെരേസ, ബാബാ ആംതെ, അരവിന്ദ് കേജ്‌രിവാള്‍ തുടങ്ങിയവരാണ് മുമ്പ് മഗ്‌സസേ പുരസ്‌കാരത്തിന് അര്‍ഹരായ ഇന്ത്യക്കാര്‍. പൊതുസേവനം, സാമുദായിക നേതൃത്വം, മാധ്യമപ്രവർത്തനം, സമാധാനം എന്നീ മേഖലകളിലെ സംഭാവനക്കാണ് പുരസ്കാരം നൽകുന്നത്.

ബോറിസ് ജോണ്‍സണ്‍ ബ്രിട്ടന്റെ പുതിയ പ്രധാനമന്ത്രി

തെരേസ മെയുടെ പിന്‍ഗാമിയായി വന്ന ബ്രിട്ടന്റെ പുതിയ പ്രധാനമന്ത്രി ബോറിസ് ജോണ്‍സനെ കണ്‍സര്‍വേറ്റിവ് പാര്‍ട്ടി നേതാവായും തിരഞ്ഞെടുത്തു. വിദേശകാര്യ സെക്രട്ടറി ജെറമി ഹണ്ടായിരുന്നു ലണ്ടനിലെ മുന്‍ മേയറായിരുന്ന ബോറിസ് ജോണ്‍സന്റെ പ്രധാന എതിരാളി. ബോറിസ് ജോണ്‍സണ്  92,153 വോട്ടും (66 ശതമാനം) ജെറമി ഹണ്ടിന് 46,656 വോട്ടും ലഭിച്ചു.
1940 മുതലുള്ള ബ്രിട്ടീഷ് പ്രധാനമന്ത്രിമാര്‍
1 വിന്‍സ്റ്റണ്‍ ചര്‍ച്ചില്‍       (കണ്‍സര്‍വേറ്റീവ്) - 1940-1945
2 ക്ലെമന്റ് .ആര്‍. ആറ്റ് ലി      (ലേബര്‍)               - 1945-1951
3 വിന്‍സ്റ്റണ്‍ ചര്‍ച്ചില്‍       (കണ്‍സര്‍വേറ്റീവ്) - 1951-1955
4 ആന്തണി ഈഡന്‍               (കണ്‍സര്‍വേറ്റീവ്) - 1955-1957
5 ഹരോള്‍ഡ് മക് മിലന്‍       (കണ്‍സര്‍വേറ്റീവ്) - 1957-1963
6 അലക് ഡഗ്ലസ്സ് ഹോം       (കണ്‍സര്‍വേറ്റീവ്) - 1963-1964
7 ഹരോള്‍ഡ് വില്‍സണ്‍       (ലേബര്‍)               - 1964-1970
8 ഏഡ്വേര്‍ഡ് ഹീത്ത്           (കണ്‍സര്‍വേറ്റീവ്) - 1970-1974
9 ഹരോള്‍ഡ് വില്‍സണ്‍       (ലേബര്‍)               - 1974-1976
10 ജയിംസ് കലഹന്‍               (ലേബര്‍)               - 1976-1979
11 മാര്‍ഗരറ്റ് താച്ചര്‍              (കണ്‍സര്‍വേറ്റീവ്)  - 1979-1990
12 ജോണ്‍ മേജര്‍              (കണ്‍സര്‍വേറ്റീവ്)  - 1990-1997
13 ടോണി ബ്ലയര്‍              (ലേബര്‍)                       - 1997-2007
14 ഗോര്‍ഡന്‍ ബ്രൗണ്‍              (ലേബര്‍)                       - 2007-2010
15 ഡേവിഡ് കാമറൂണ്‍      (കണ്‍സര്‍വേറ്റീവ്)  - 2010-2015
15 തെരേസ മെയ്              (കണ്‍സര്‍വേറ്റീവ്)  - 2016-2017