ചൊവ്വല്ലൂര്‍ കൃഷ്ണന്‍കുട്ടി അന്തരിച്ചു

 

പ്രശസ്ത എഴുത്തുകാരനും പത്രപ്രവര്‍ത്തകനുമായിരുന്ന ചൊവ്വല്ലൂര്‍ കൃഷ്ണന്‍കുട്ടി അന്തരിച്ചു. ഗാനരചയിതാവ്, തിരക്കഥാകൃത്ത്, നടന്‍, ഹാസസാഹിത്യകാരന്‍, നാടകകൃത്ത്, കലാനിരൂപകന്‍ എന്നിങ്ങനെ സാഹിത്യലോകത്ത് തന്റേതായ കൈയൊപ്പ് ചാര്‍ത്തിയ പ്രതിഭയായിരുന്നു ചൊവ്വല്ലൂര്‍. മലയാള മനോരമ പത്ത്രതില്‍ അസിസ്റ്റന്റ് എഡിറ്ററായി പ്രവര്‍ത്തിച്ചു. കോഴിക്കോട് ആകാശവാണിയില്‍ കുറച്ചുകാലം സ്റ്റാഫ് ആര്‍ടിസ്റ്റായും പ്രവര്‍ത്തിച്ചു. ഭക്തിഗാനങ്ങളുടെ സൃഷ്ടാവ് എന്ന നിലയിലാണ് ചൊവ്വല്ലൂര്‍ ഏറ്റവും പ്രശസ്തനായത്. സിനിമകളില്‍ ഗാനരചനയ്ക്കു പുറമേ കഥയും തിരക്കഥയും സംഭാഷണവും എഴുതിയിട്ടുണ്ട്. കൊടുങ്ങല്ലൂര്‍ കാവില്‍ വാരിയത്ത് ശങ്കുണ്ണിവാര്യരുടെയും ചൊവ്വല്ലൂര്‍ വാരിയത്ത് പാറുക്കുട്ടി വാരസ്യാരുടെയും മകനായി 1936-ല്‍ ജനിച്ചു.

സി വി രാമന്‍പിള്ള ഓര്‍മയായിട്ട് ഇന്നേക്ക് നൂറുവര്‍ഷം

 

സി വി രാമന്‍പിള്ള എന്ന മലയാള സാഹിത്യകുലപതി ഓര്‍മയായിട്ട് ഇന്നേക്ക് നൂറുവര്‍ഷം തികയുന്നു. 1858 മെയ് 19-ന് തിരുവനന്തപുരത്ത് ജനിച്ച സി.വി.  1922 മാര്‍ച്ച് 21-ന് അന്തരിച്ചു. കേരള സ്‌കോട്ട് എന്ന വിളിപ്പേരില്‍ പ്രസിദ്ധനായിരുന്നു ഇദ്ദേഹം.

അദ്ദേഹത്തിന്റെ ആദ്യ നോവല്‍ മാര്‍ത്താണ്ഡവര്‍മ്മ പ്രസിദ്ധീകൃതമായിട്ട് 130 വര്‍ഷം കഴിഞ്ഞു. ഇന്നും മലയാളത്തില്‍ ഏറെ വായിക്കപ്പെടുന്ന നോവലാണിത്. മാര്‍ത്താണ്ഡവര്‍മ്മ, ധര്‍മ്മരാജാ, രാമരാജ ബഹദൂര്‍ എന്നീ ചരിത്ര നോവലുകളാണ് സി.വി. യുടെ പ്രധാന രചനകള്‍. ഇവ മൂന്നിനേയും ചേര്‍ത്ത് സി.വി.യുടെ ചരിത്രാഖ്യായികകള്‍ എന്ന് വിളിക്കുന്നു. ഇതിനും പുറമേ നിരവധി ഹാസ്യനാടകങ്ങളും ഇദ്ദേഹം രചിച്ചിട്ടുണ്ട്.

2020 ലെ സാഹിത്യത്തിനുള്ള നൊബേല്‍ പുരസ്‌കാരം; അമേരിക്കന്‍ കവയിത്രി ലൂയിസ് ഗ്ലുക് (Louise Gluck) നേടി

ഈ വര്‍ഷത്തെ സാഹിത്യ നോബല്‍ പുരസ്‌കാരം അമേരിക്കന്‍ കവയിത്രി ലൂയിസ് ഗ്ലുക് (Louise Gluck) നേടി. സമകാലീന അമേരിക്കന്‍ സാഹിത്യത്തിലെ ഏറ്റവും പ്രമുഖ കവികളിലൊരാളാണ് ഗ്ലുക്. നൊബേല്‍ സമ്മാനം ലഭിക്കുന്ന 16-ാമത്തെ വനിതയാണിവര്‍. 

1943 ല്‍ ന്യൂയോര്‍ക്കില്‍ ജനിച്ച ഗ്ലുക്, മസാച്യൂസെറ്റ്‌സിലാണു താമസം. യുഎസിലെ യേല്‍ സര്‍വകലാശാല ഇംഗ്ലിഷ് പ്രഫസറാണ്. അഞ്ചു ദശകം പിന്നിടുന്ന കാവ്യജീവിതത്തില്‍ നാഷനല്‍ ബുക് അവാര്‍ഡ്, പുലിറ്റ്‌സര്‍ പ്രൈസ് എന്നിവ അടക്കം ഒട്ടേറെ പുരസ്‌കാരങ്ങള്‍ നേടി. 12 കാവ്യസമാഹാരങ്ങളും ലേഖനസമാഹാരങ്ങളും പ്രസിദ്ധീകരിച്ചു. മരണവും കുട്ടിക്കാലവും കുടുംബജീവിതവും ഗ്ലുക്കിന്റെ കവിതകളിലെ മുഖ്യ പ്രമേയങ്ങളാണ്. 19ാം നൂറ്റാണ്ടിലെ യുഎസ് കവി എമിലി ഡിക്കിന്‍സണിനോടാണു ഗ്ലുക്കിനെ സ്വീഡിഷ് അക്കാദമി താരതമ്യം ചെയ്തത്. 

ഫസ്റ്റ്‌ബോണ്‍ (1968) വൈല്‍ഡ് ഐറിസ് (1992), അവര്‍ണോ (2006) തുടങ്ങിയവയാണ് പ്രധാന കൃതികള്‍. 

കവി ഡോ.പുതുശ്ശേരി രാമചന്ദ്രന്‍ അന്തരിച്ചു.

കവിയും എഴുത്തുകാരനും സ്വാതന്ത്ര്യ സമര സേനാനിയുമായ ഡോ.പുതുശ്ശേരി രാമചന്ദ്രന്‍ അന്തരിച്ചു. 92 വയസ്സായിരുന്നു. മലയാളത്തിലെ വിപ്ലവ സാഹിത്യത്തിന്റെ മുന്നണിക്കാരില്‍ ഒരാളാണ് ഇദ്ദേഹം. മാവേലിക്കര താലൂക്കിലെ വള്ളികുന്നത്ത് 1928 സെപ്തംബര്‍ 23ന് പോക്കാട്ട് ദാമോദരന്‍ പിള്ളയുടെയും പുതുശ്ശേരില്‍ ജാനകിയമ്മയുടെയും മകനായാണ് ജനനം. 'തിളച്ച മണ്ണിന്‍ കാല്‍ നടയായ്'  ഇതാണ് പുതുശ്ശേരിയുടെ ആത്മകഥയുടെ പേര്.
മലയാള ഭാഷയ്ക്ക് ശ്രേഷ്ഠ പദവി നേടി എടുക്കുന്നതില്‍ പുതുശ്ശേരി രാമചന്ദ്രന്‍ നിര്‍ണ്ണായക പങ്കാണ് വഹിച്ചത്. ഇദ്ദേഹം അധ്യക്ഷനായ സമിതി 9 മാസം കൊണ്ട് നാല് വാള്യങ്ങളായി തയ്യാറാക്കിയ റിപ്പോര്‍ട്ടായിരുന്നു ശ്രേഷ്ഠഭാഷാ പദവിക്കായുള്ള ശ്രമത്തിന്റെ പ്രധാന ഘടകം.
1957ല്‍ കൊല്ലം എസ്.എന്‍.കോളേജില്‍ അധ്യാപക ജിവിതം തുടങ്ങിയ പുതുശ്ശേരി കേരള സര്‍വകലാശാലയിലെ മലയാള വിഭാഗം പ്രൊഫസറായാണ് വിരമിച്ചത്.
കേന്ദ്ര സാഹിത്യ അക്കാദമി പുരസ്‌കാരം, എഴുത്തച്ഛന്‍ പുരസ്‌കാരം, മഹാകവി ഉള്ളൂര്‍ അവാര്‍ഡ്, കുമാരനാശാന്‍ അവാര്‍ഡ്. വള്ളത്തോള്‍ അവാര്‍ഡ് അടക്കം നിരവധി അംഗീകാരങ്ങളാണ് അദ്ദേഹത്തെ തേടിയെത്തിയത്.
ഗ്രാമീണ ഗായകന്‍, ആവുന്നത്ര ഉച്ചത്തില്‍, ശക്തിപൂജ, പുതിയ കൊല്ലനും പുതിയൊരാലയും, ഈ വീട്ടില്‍ ആരുമില്ലേ, എന്റെ സ്വാതന്ത്ര്യസമര കവിതകള്‍, പുതുശ്ശേരി കവിതകള്‍, കണ്ണശ്ശരാമായണം (ബാല, യുദ്ധ, സുന്ദര,
കിഷ്‌ക്കിന്ധാ കാണ്ഡങ്ങള്‍), പ്രാചീന മലയാളം, കേരള പാണിനീയം, കേരള പാണിനീയ വിമര്‍ശം, കേരള ചരിത്രത്തിന്റ അടിസ്ഥാന രേഖകള്‍ തുടങ്ങിയവയാണ് പ്രധാന കൃതികള്‍. പരേതയായ ബി.രാജമ്മയാണ് ഭാര്യ.

കവി വി. മധുസൂദനന്‍ നായര്‍ക്കും ശശി തരൂരിനും കേന്ദ്ര സാഹിത്യ അക്കാദമി പുരസ്‌കാരം.

വി. മധുസൂദനന്‍ നായരുടെ 'അച്ഛന്‍ പിറന്ന വീട്' എന്ന കാവ്യത്തിനാണ് പുരസ്‌കാരം. ഇംഗ്ലീഷ് വിഭാഗത്തില്‍ 'ആന്‍ ഇറ ഓഫ് ഡാര്‍ക്‌നസ്' എന്ന നോണ്‍ ഫിക്ഷന്‍ പുസ്തകത്തിനാണ് ശശി തരൂര്‍ എം.പി പുരസ്‌കാരത്തിനര്‍ഹനായത്.
സ്വാതന്ത്യത്തിനു മുമ്പുള്ള ഇരുണ്ടകാലത്തെക്കുറിച്ചാണ് ശശി തരൂരിന്റെ 'ആന്‍ ഇറ ഓഫ് ഡാര്‍ക്‌നസ്' എന്ന പുസ്തകം.
ഒരു ലക്ഷം രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്‌കാരം. ഡോ. ചന്ദ്രമതി, എന്‍.എസ്. മാധവന്‍, പ്രൊഫ. എം. തോമസ് മാത്യു. എന്നിവരടങ്ങിയ ജൂറിയാണ് മലയാളവിഭാഗത്തില്‍ പുരസ്‌കാരം നിശ്ചയിച്ചത്. ഡോ. ജി.എന്‍. ദേവി, പ്രൊഫ. കെ. സച്ചിദാനന്ദന്‍, പ്രൊഫ. സുഗന്ധ ചൗധരി എന്നിവരടങ്ങിയ ജൂറിയാണ് ശശി തരൂരിന്റെ കൃതി തിരഞ്ഞെടുത്തത്.

2019 ലെ എഴുത്തച്ഛന്‍ പുരസ്‌കാരം നോവലിസ്റ്റും ചെറുകഥാകൃത്തും രാഷ്ട്രീയചിന്തകനുമായ ആനന്ദിന്.

മലയാളത്തിലെ സമുന്നതനായ എഴുത്തുകാരില്‍ ഒരാളായ ആനന്ദിന് എഴുത്തച്ഛന്‍ പുരസ്‌കാരം. സമഗ്രസംഭാവനയ്ക്ക് നല്‍കുന്ന കേരള സര്‍ക്കാരിന്റെ പരമോന്നത സാഹിത്യ പുരസ്‌കാരമാണ് എഴുത്തച്ഛന്‍ പുരസ്‌കാരം.നോവല്‍, ചെറുകഥ, നാടകം, ലേഖനം, പഠനം എന്നിങ്ങനെ വ്യത്യസ്ത വിഭാഗങ്ങളായി ഇരുപതോളം കൃതികള്‍ രചിച്ചിട്ടുണ്ട്. ഗോവര്‍ധന്റെ യാത്രകള്‍ക്ക് 1997ലെ കേന്ദ്രസാഹിത്യ അക്കാദമി അവാര്‍ഡും മരുഭൂമികള്‍ ഉണ്ടാവുന്നത് എന്ന നോവലിന് വയലാര്‍ അവാര്‍ഡും ലഭിച്ചിട്ടുണ്ട്. 1936 ല്‍ ഇരിങ്ങാലക്കുടയില്‍ ജനിച്ച ആനന്ദിന്റെ ശരിയായ പേര് പി. സച്ചിദാനന്ദന്‍ എന്നാണ്. തിരുവനന്തപുരം എന്‍ജിനീയറിങ് കോളേജില്‍നിന്ന് സിവില്‍ എന്‍ജിനീയറിങ് ബിരുദം നേടിയ അദ്ദേഹം പട്ടാളത്തിലും സേവനമനുഷ്ഠിച്ചിട്ടുണ്ട്.

Nobel prize 2019: സാഹിത്യത്തിനുള്ള നൊബേല്‍, 2018 ലെ പുരസ്‌കാരത്തിന് ഓള്‍ഗ ടോകാര്‍ചുക്കും (Olga Tokarczuk) 2019 ലെ പുരസ്‌കാരത്തിന് പീറ്റര്‍ ഹന്‍ഡ്‌കെയും (Peter Handke) അര്‍ഹരായി.

Peter Handke and Olga Tokarczuk

2018ലെ പുരസ്‌കാരത്തിന് പോളിഷ് എഴുത്തുകാരി ഓള്‍ഗ ടോകാര്‍ചുക്കും (Olga Tokarczuk) 2019 ലെ പുരസ്‌കാരത്തിന് ഓസ്ട്രിയന്‍ എഴുത്തുകാരന്‍ പീറ്റര്‍ ഹന്‍ഡ്‌കെയും (Peter Handke)  അര്‍ഹരായി. 2018ലെ മാന്‍ ബുക്കര്‍ പുരസ്‌കാര ജേതാവ് കൂടിയായ ഓള്‍ഗ ടോകാര്‍ചുക്ക്. സിറ്റീസ് ഇന്‍ മീററസ്, ദി ജെര്‍ണി ഓഫ് ദി ബുക്ക് പീപ്പിള്‍, പ്രീമിവെല്‍ ആന്‍ഡ് അദര്‍ ടൈംസ്, ഹൗസ് ഓഫ് ഡേ ഹൗസ് ഓഫ് നൈറ്റ്, ദി വാര്‍ഡൊബിള്‍, ദ ഡോള്‍ ആന്‍ഡ് ദി പേള്‍ തുടങ്ങിയവയാണ് ഓള്‍ഗയുടെ പ്രധാന രചനകള്‍. ഓള്‍ഗയുടെ കൃതികള്‍ നിരവധി ഭാഷകളിലേക്ക് വിവര്‍ത്തനം ചെയ്യപ്പെട്ടിട്ടുണ്ട്. നോവലിസ്റ്റും നാടകകൃത്തും വിവര്‍ത്തകനുമാണ് പീറ്റര്‍ ഹന്‍ഡ്‌കെ.
പ്രത്യേക കാരണങ്ങളാല്‍ 2018ല്‍ സാഹിത്യത്തിനുള്ള നൊബേല്‍ സമ്മാനം പ്രഖ്യാപിച്ചിരുന്നില്ല. അതുകൊണ്ടാണ് 2018ലെയും 2019ലെയും പുരസ്‌കാരങ്ങള്‍ ഇപ്പോള്‍ ഒന്നിച്ച് പ്രഖ്യാപിച്ചിരിക്കുന്നത്.

ഡോ. ചാത്തനാത്ത് അച്യുതനുണ്ണിക്ക് ശ്രേഷ്ഠഭാഷാ പുരസ്‌കാരം

സമഗ്രസംഭാവനയ്ക്കുള്ള രാഷ്ട്രപതിയുടെ ശ്രേഷ്ഠഭാഷാ പുരസ്‌കാരം (5 ലക്ഷം രൂപ) മലയാളഭാഷാവിഭാഗത്തില്‍ കവിയും അധ്യാപകനുമായ ഡോ. ചാത്തനാത്ത് അച്യുതനുണ്ണി നേടി. അഞ്ചുലക്ഷം രൂപയാണ് പുരസ്‌കാരത്തുക. കാലിക്കറ്റ് സര്‍വകലാശാല മലയാളവിഭാഗം മുന്‍മേധാവിയായ ഡോ. ചാത്തനാത്ത് അച്യുതനുണ്ണിക്കു കേരള സാഹിത്യ അക്കാദമി പുരസ്‌കാരം, കേരളസാഹിത്യ അക്കാദമിയുടെ സമഗ്രസംഭാവനയ്ക്കുള്ള പുരസ്‌കാരം തുടങ്ങിയവയും ലഭിച്ചിട്ടുണ്ട്.  കൂടാതെ മലയാളഭാഷാ കമ്പ്യൂട്ടിങ് രംഗത്തെ ഗവേഷണങ്ങള്‍ക്കുള്ള രാഷ്ട്രപതിയുടെ മഹര്‍ഷി ഭദ്രയാന്‍ വ്യാസ് സമ്മാന്‍ പുരസ്‌കാരത്തിന് (ഒരു ലക്ഷം രൂപ വീതം) വിക്കിമീഡിയ  ഫൗണ്ടേഷനിലെ പ്രിന്‍സിപ്പല്‍ ലാംഗ്വേജ് എന്‍ജിനീയര്‍ സന്തോഷ് തോട്ടിങ്ങളും സംസ്ഥാന സര്‍ക്കാരിനു കീഴിലുള്ള ഇന്റര്‍നാഷണല്‍  സെന്റര്‍ ഫോര്‍  ഫ്രീ ആന്‍ഡ് ഓപ്പണ്‍ സോഴ്‌സ് സോഫ്റ്റ്‌വെയര്‍ പ്രോഗ്രാം ഹെഡ് ഡോ. ആര്‍. ആര്‍. രാജീവും അര്‍ഹരായി. ആദ്യമായാണ് മലയാളത്തിന് മഹര്‍ഷി ഭദ്രയാന്‍ വ്യാസ് സമ്മാന്‍ ലഭിക്കുന്നത്. സംസ്‌കൃതം, അറബിക്, പേര്‍ഷ്യന്‍, ശ്രേഷ്ഠഭാഷകളായ കന്നട, തെലുങ്ക്,  മലയാളം എന്നിങ്ങനെ 9 ഭാഷകളില്‍നിന്നായി 45 വിദഗ്ധര്‍ക്കാണ് രാഷ്ട്രപതിയുടെ ഭാഷാപുരസ്‌കാരം നല്‍കിയത്.

പാപുവ ന്യൂഗിനിയ: ലോകത്തില്‍ ഏറ്റവും കൂടുതല്‍ ഭാഷകളുള്ള രാജ്യം

ലോകത്തില്‍ ഏറ്റവും കൂടുതല്‍ ഭാഷകളുള്ളത് ഏതു രാജ്യത്താണ് എന്നൊരു ചോദ്യം വന്നാല്‍ നിങ്ങളുടെ ഉത്തരം എന്താകും?! ലോകത്തിലെ ഏറ്റവും വലിയരാജ്യത്തോ, ഏറ്റവും ജനസംഖ്യയുള്ള രാജ്യത്തോ ആയിരിക്കും ഏറ്റവും കൂടുതല്‍ ഭാഷകളുള്ളത് എന്നാവും നിങ്ങള്‍ വിചാരിക്കുക. എന്നാല്‍ അങ്ങനെയൊന്നുമല്ല കാര്യങ്ങള്‍. ഓഷ്യാനിയ പ്രദേശത്ത് (Oceania) സ്ഥിതിചെയ്യുന്ന പാപുവ ന്യൂഗിനി (Papua New Guinea) എന്ന താരതമ്യേന ചെറിയ രാജ്യത്താണ് ഏറ്റവുമധികം ഭാഷകള്‍ സജീവമായി നിലവിലുള്ളത് എന്നാണ് എത്‌നോലോഗ് (Ethnologue) എന്ന പ്രസിദ്ധീകരണത്തിന്റെ ഏറ്റവും പുതിയ എഡിഷന്‍ പറഞ്ഞുതരുന്നത്. 840 ഭാഷകള്‍ ഇവിടെ ഇപ്പോഴും ഉപയോഗിക്കപ്പെടുന്നുണ്ടത്രേ! ഈ പട്ടിക പ്രകാരം ഇന്ത്യ നാലാമതാണ്. 453 ഭാഷകളാണ് നമ്മുടെ രാജ്യത്ത് സജീവമായുള്ളത് എന്നാണ് കണ്ടെത്തല്‍.
ആസ്‌ട്രേലിയന്‍ ആധിപത്യത്തില്‍നിന്നും 1975ല്‍ സ്വതന്ത്രമായ രാജ്യമാണ് പാപുവ ന്യൂഗിനി.
ലോകത്താകമാനം സജീവമായി ഉപയോഗിക്കപ്പെടുന്ന ഏകദേശം 6700 ഭാഷകളില്‍ 40 ശതമാനത്തോളം അധികം താമസിയാതെ അപ്രത്യക്ഷമാകും എന്ന യുഎന്‍ പഠനവും അടുത്തകാലത്ത് പുറത്തുവന്നിട്ടുണ്ട്.

വള്ളത്തോള്‍ പുരസ്‌കാരം സക്കറിയയ്ക്ക്

ഈ വര്‍ഷത്തെ വള്ളത്തോള്‍ പുരസ്‌കാരം പ്രശസ്ത നോവലിസ്റ്റും കഥാകൃത്തുമായ സക്കറിയയ്ക്ക്. മലയാള ചെറുകഥാ സാഹിത്യത്തെ ലോകനിലവാരത്തിലേക്ക് ഉയര്‍ത്തുന്നതില്‍ സക്കറിയയുടെ കഥകള്‍ നിര്‍ണായക പങ്കുവഹിച്ചിട്ടുള്ളതായി ജൂറി വിലയിരുത്തി.
 വള്ളത്തോള്‍  സാഹിത്യസമിതി നല്‍കുന്ന ഈ പുരസ്‌കാരത്തിന് 1, 11, 111 രൂപയും കീര്‍ത്തിഫലകവുമാണ് സമ്മാനം. വള്ളത്തോളിന്റെ ജന്മവാര്‍ഷികദിനമായ ഒക്ടോബര്‍ 16 -ന് തിരുവനന്തപുരത്ത് തീര്‍ഥപാദമണ്ഡപത്തില്‍ നടക്കുന്ന സാഹിതീയോത്സവത്തിലാണ് പുരസ്‌കാരം നല്‍കുന്നത്.
ഒട്ടേറെ തമിഴ് സാഹിത്യകൃതികള്‍ മലയാളത്തിലേക്ക് വിവര്‍ത്തനം ചെയ്ത കെ.ജി. ചന്ദ്രശേഖരന്‍നായര്‍ക്ക് വള്ളത്തോള്‍ കീര്‍ത്തിമുദ്രയും സമ്മാനിക്കും.

പ്രശസ്ത തമിഴ് സാഹിത്യകാരന്‍ തോപ്പില്‍ മുഹമ്മദ് മീരാന്‍ അന്തരിച്ചു

മലയാളിയായ തമിഴ് എഴുത്തുകാരന്‍ തോപ്പില്‍ മുഹമ്മദ് മീരാന്‍ 1944, സെപ്തംബര്‍ 26ന് കന്യാകുമാരി ജില്ലയിലെ തേങ്ങാപ്പട്ടണത്ത് ജനിച്ചു. ഇദ്ദേഹത്തിന്റെ പല കഥകളും ചരിത്രവുമായി ബന്ധപ്പെട്ട് കിടക്കുന്നവയാണ്. വിവിധ കാലഘട്ടങ്ങളിലെ സാമൂഹിക പരിവര്‍ത്തനങ്ങളും അദ്ദേഹത്തിന്റെ രചനകള്‍ക്ക് വിഷയമായിട്ടുണ്ട്. കേന്ദ്ര സാഹിത്യ അക്കാദമി പുരസ്‌കാരമടക്കം (1997) നിരവധി ബഹുമതികള്‍ നേടിയിട്ടുണ്ട്. പ്രശസ്ത ഭാഷാ ശാസ്ത്രപണ്ഡിതന്‍ ഡോ. ടി.ബി. വേണുഗോപാലപ്പണിക്കര്‍ 'കൂനന്‍ തോപ്പിന്' തയാറാക്കിയ മലയാള വിവര്‍ത്തനം പരിഭാഷയ്ക്കുള്ള കേന്ദ്ര സാഹിത്യ അക്കാദമി പുരസ്‌കാരം നേടുകയുണ്ടായി (2005).