കര്‍ണാടകയ്ക്ക് പുതിയ ചീഫ് ജസ്റ്റീസ്

ജസ്റ്റീസ് അഭയ് ശ്രീനിവാസ ഒക്ക (Justice Abhay Shreeniwas Oka) കര്‍ണാടക ഹൈക്കോടതിയുടെ പുതിയ ചീഫ് ജസ്റ്റീസ് ആയി ചുമതലയേറ്റു. മുംബൈ ഹൈക്കോടതിയിലെ സീനിയര്‍ ജഡ്ജിയായിരുന്നു ഇദ്ദേഹം. 1983ല്‍ അഭിഭാഷകവൃത്തിയില്‍ എത്തിയ ഇദ്ദേഹം 2005ലാണ് സ്ഥിരം ജഡ്ജിയായി നിയമിതനായത്.

കാമി റിത ഷെര്‍പ 23-ാമത് തവണ എവറസ്റ്റിന് മുകളില്‍!

നേപ്പാളി പര്‍വതാരോഹകന്‍ കാമി റിത ഷെര്‍പയ്ക്ക് (Kami Rita Sherpa)  ) എവറസ്റ്റ് കയറ്റം പൂ പറിക്കുന്നതുപോലെ ലളിതമാണ്! ഒന്നും രണ്ടുമല്ല, ഇരുപത്തിമൂന്ന് തവണയാണ് ഇദ്ദേഹം ഏവറസ്റ്റിന് മുകളിലെത്തിയത്! 2018 മെയ് 20ന് 22-ാമത് തവണ എവറസ്റ്റിലെത്തിയപ്പോള്‍ കാമി ഈ നേട്ടം കൈവരിക്കുന്ന ലോകത്തെ ആദ്യ വ്യക്തിയായി മാറിയിരുന്നു. ഇപ്പോഴിതാ 2019 മെയ് 15ന് ഒരിക്കല്‍ കൂടി അദ്ദേഹം ഈ നേട്ടത്തിലെത്തിയിരിക്കുകയാണ്. 25 തവണ എവറസ്റ്റിലെത്തുക എന്നതാണത്രേ ഇദ്ദേഹത്തിന്റെ ലക്ഷ്യം! കാമിയുടെ പിതാവ് ആദ്യകാല എവറസ്റ്റ് ഗൈഡുമാരിലൊരാളായിരുന്നു. സഹോദരനാകട്ടെ 17 തവണ എവറസ്റ്റ് കീഴടക്കിയ വ്യക്തിയും.
നേപ്പാളുകാര്‍ തന്നെയായ അപ്പ ഷെര്‍പ്പയും (Apa Sherpa) ഫുര്‍ബ താഷി ഷെര്‍പ്പയും (Phurba Tashi Sherpa) 21 തവണ എവറസ്റ്റ് കീഴടക്കിയവരാണ്.

പ്രശസ്ത തമിഴ് സാഹിത്യകാരന്‍ തോപ്പില്‍ മുഹമ്മദ് മീരാന്‍ അന്തരിച്ചു

മലയാളിയായ തമിഴ് എഴുത്തുകാരന്‍ തോപ്പില്‍ മുഹമ്മദ് മീരാന്‍ 1944, സെപ്തംബര്‍ 26ന് കന്യാകുമാരി ജില്ലയിലെ തേങ്ങാപ്പട്ടണത്ത് ജനിച്ചു. ഇദ്ദേഹത്തിന്റെ പല കഥകളും ചരിത്രവുമായി ബന്ധപ്പെട്ട് കിടക്കുന്നവയാണ്. വിവിധ കാലഘട്ടങ്ങളിലെ സാമൂഹിക പരിവര്‍ത്തനങ്ങളും അദ്ദേഹത്തിന്റെ രചനകള്‍ക്ക് വിഷയമായിട്ടുണ്ട്. കേന്ദ്ര സാഹിത്യ അക്കാദമി പുരസ്‌കാരമടക്കം (1997) നിരവധി ബഹുമതികള്‍ നേടിയിട്ടുണ്ട്. പ്രശസ്ത ഭാഷാ ശാസ്ത്രപണ്ഡിതന്‍ ഡോ. ടി.ബി. വേണുഗോപാലപ്പണിക്കര്‍ 'കൂനന്‍ തോപ്പിന്' തയാറാക്കിയ മലയാള വിവര്‍ത്തനം പരിഭാഷയ്ക്കുള്ള കേന്ദ്ര സാഹിത്യ അക്കാദമി പുരസ്‌കാരം നേടുകയുണ്ടായി (2005).

നാലാം ഐപിഎല്‍ കിരീടം മുംബൈ ഇന്ത്യന്‍സിന്.

ഉപ്പലിലെ രാജീവ് ഗാന്ധി സ്റ്റേഡിയത്തില്‍ ആവേശപോരാട്ടത്തിനൊടുവില്‍ മുംബൈ ഇന്ത്യന്‍സിന് നാലാം ഐ.പി.എല്‍ കിരീടം. അവസാന പന്തില്‍ മലിംഗ ശര്‍ദ്ധുല്‍ ഠാക്കൂറിനെ വിക്കറ്റിന് മുന്നില്‍ കുരുക്കി ചെന്നൈയെ ഒരൊറ്റ റണ്ണിന് തോല്‍പ്പിച്ചു. ഐപിഎല്‍ കിരീടം നാല് തവണ നേടുന്ന ആദ്യ ടീമായി മുംബൈ ചരിത്രത്തില്‍ ഇടം നേടി. നേരത്തെ ടോസ് നേടി ബാറ്റിങ്ങിനിറങ്ങിയ മുംബൈ ഇന്ത്യന്‍സ് നിശ്ചിത ഓവറില്‍ എട്ടു വിക്കറ്റ് നഷ്ടത്തില്‍ 149 റണ്‍സ് അടിച്ചു.

ഈ വര്‍ഷത്തെ എസ്എസ്എല്‍സി പരീക്ഷ ഫലം പ്രഖ്യാപിച്ചു

ഈ വര്‍ഷത്തെ എസ്.എസ്.എല്‍.സി. ടി.എച്ച്.എല്‍.സി. ഫലം പ്രഖ്യാപിച്ചു. എസ്.എസ്.എല്‍.സി പരീക്ഷ എഴുതിയവരില്‍ 98.11 ശതമാനം പേര്‍ ഉപരിപഠനത്തിന് യോഗ്യത നേടി. 37,334 വിദ്യാര്‍ഥികള്‍ക്ക് എല്ലാ വിഷയത്തിലും എ പ്ലസ് ലഭിച്ചു.

പത്തനംതിട്ട റവന്യൂജില്ലയിലാണ് ഏറ്റവും കൂടുതല്‍ വിജയശതമാനം(99.33), ഏറ്റവും കുറവ് വിജയശതമാനം വയനാട് റവന്യൂജില്ലയിലും(93.22). കുട്ടനാട് വിദ്യാഭ്യാസ ജില്ലയാണ് ഏറ്റവും കൂടുതല്‍ വിജയശതമാനം നേടിയ വിദ്യാഭ്യാസജില്ല.

SSLC Result 2019

ലോക്പാലിന് ആദ്യ ചെയർപേഴ്‌സനായി ജസ്റ്റീസ് പിനാകി ചന്ദ്ര ഘോഷ് നിയമിതനായി(Justice Pinaki Chandra Ghose has been appointed as the first Chairperson of Lokpal)

ഇന്ത്യയിലെ ആദ്യ ലോക്പാല്‍ (Lokpal - ‘caretaker of people’) ചെയർപേഴ്‌സനായി ജസ്റ്റീസ് പിനാകി ചന്ദ്ര ഘോഷ് (Justice Pinaki Chandra Ghose)നിയമിതനായി. സുപ്രീം കോടതി ജഡ്ജിയായിരുന്നു ഇദ്ദേഹം. അഴിമതി വിരുദ്ധ സമിതിയാണ് മൂന്നംഗങ്ങളുള്ള ലോക് പാല്‍. ഒരു അധ്യക്ഷനും ജുഡീഷ്യല്‍ അംഗവും നോണ്‍ ജുഡീഷ്യല്‍ അംഗവും ചേര്‍ന്നതാണ് ലോക്പാല്‍ സമിതി. 2013ല്‍ ആണ് ലോക്പാല്‍ ലോകായുക്ത നിയമം പാസായത്.